បរទេស៖ នេះបើយោងតាមការចេញផ្សាយរបស់សារព័ត៌មាន VAN បានអោយដឹងថាប្រទេសឥណ្ឌូណេស៊ីកំពុងឈានចូលទៅក្នុងរលកទីបួននៃការឆ្លងរាលដាលជំងឺកូវីដ-១៩។ នេះបើយោងតាមប្រធានក្រុមការងារសមាគមវេជ្ជសាស្ត្រឥណ្ឌូណេស៊ី (IDI) លោកសាស្ត្រាចារ្យ Zubairi Djoerban។
លោកសាស្ត្រាចារ្យ Zubairi Djoerban ត្រូវបានដកស្រង់សម្តីដោយទីភ្នាក់ងារសារព័ត៌មាន Antara ដែលបាននិយាយថា ករណីឆ្លងជំងឺកូវីដ-១៩ ប្រចាំថ្ងៃរបស់ប្រទេសឥណ្ឌូណេស៊ីបានចាប់ផ្តើមកើនឡើងចាប់ពីថ្ងៃទី២ ខែកក្កដា ឆ្នាំ២០២២ នៅពេលដែលករណីឆ្លងត្រូវបានកត់ត្រាចំនួន ១ ៧៩៤នាក់។ ចាប់តាំងពីពេលនោះមក ករណីឆ្លងប្រចាំថ្ងៃបានបង្ហាញពីនិន្នាការកើនឡើង។
លោកបាននិយាយបន្ថែមថា ជាការគួរឱ្យកត់សម្គាល់ថា មានករណីឆ្លងថ្មីចំនួន ៣ ៨២២នាក់ និងករណីស្លាប់ថ្មីចំនួន ១២នាក់ត្រូវបានកត់ត្រាកាលពីថ្ងៃទី១៣ ខែកក្កដា។
លោកបានអំពាវនាវដល់សាធារណជនឱ្យបន្តអនុវត្តតាមពិធីសារសុខភាព និងចាក់វ៉ាក់សាំងបង្ការដូសជំរុញទី៣ ឱ្យបានឆាប់ ដើម្បីទប់ស្កាត់ការចម្លងជំងឺកូវីដ-១៩។
យោងតាមទិន្នន័យពីក្រុមការងារគ្រប់គ្រងជំងឺកូវីដ-១៩ របស់រដ្ឋាភិបាលឥណ្ឌូណេស៊ីបានឱ្យដឹងថា ប្រជាជាតិនៅតំបន់អាស៊ីអាគ្នេយ៍មួយនេះបានកត់ត្រាករណីឆ្លងថ្មីចំនួន ៣ ៣៦១នាក់កាលពីថ្ងៃទី១៤ ខែកក្កដា ដែលធ្វើឱ្យចំនួនសរុបកើនឡើងដល់ ៦ ១១៦ ៣៤៧នាក់។
មូលដ្ឋានដែលបានរាយការណ៍ករណីឆ្លងថ្មីច្រើនបំផុត គឺទីក្រុងហ្សាការតាដែលមាន ១ ៥៩៤នាក់ បន្ទាប់មកគឺកោះចាវ៉ាខាងលិច (៧២៨នាក់) កោះបានតេន (៣៩៣នាក់) កោះចាវ៉ាខាងកើត (២៧៩នាក់) និងកោះបាលី (១២៥នាក់)៕
ប្រភព៖ ក្រសួងព័ត៌មាន
