បរទេស៖ ប្រភពនៅក្នុងរដ្ឋបាលសេតវិមានបានឱ្យដឹងថា ប្រធានាធិបតីសហរដ្ឋអាមេរិក លោក ចូ បៃដិន គ្រោងនឹងប្រកាសកញ្ចប់ថវិកាថ្មីចំនួន ១ប៊ីលានដុល្លារអាម៉េរិកជាជំនួយស្បៀងអាហារដល់មជ្ឈិមបូព៌ា។
ប្រភពនោះបាននិយាយថា «ប្រធានាធិបតីនឹងប្រកាសនៅថ្ងៃនេះថា សហរដ្ឋអាមេរិកបានសន្យានូវថវិកាចំនួន ១ប៊ីលានដុល្លារអាម៉េរិកនៅក្នុងជំនួយសន្តិសុខស្បៀងអាហាររយៈពេលវែងដែលជាកម្រិតថ្មីមួយសម្រាប់តំបន់មជ្ឈិមបូព៌ា និងអាហ្វ្រិកខាងជើង»។
យោងតាមទីភ្នាក់ងារព័ត៌មាន Bloomberg បានឱ្យដឹងថា ប្រធានាធិបតីសហរដ្ឋអាមេរិកត្រូវបានគេរំពឹងថានឹងធ្វើសេចក្តីប្រកាសស្តីពីជំនួយស្បៀងអាហារដែលមានថវិកាចំនួន ១ប៊ីលានដុល្លារអាម៉េរិកបន្ទាប់ពីដំណើរទស្សនកិច្ចរបស់លោកទៅកាន់ទីក្រុង Jeddah នៃប្រទេសអារ៉ាប៊ីសាអូឌីត។
ប្រធានាធិបតីសហរដ្ឋអាមេរិក លោក បៃដិន បានចេញដំណើរកាលពីថ្ងៃទី១២ ខែកក្កដា ក្នុងដំណើរទស្សនកិច្ចជាលើកដំបូងនៅតំបន់មជ្ឈិមបូព៌ាចាប់តាំងពីលោកបានចូលកាន់តំណែងជាប្រធានាធិបតីនៃសេតវិមានកាលពីក្នុងខែមករា ឆ្នាំ២០២១ មក៕
ប្រភព៖ ក្រសួងព័ត៌មាន
