បរទេស៖ អ្នកនាំពាក្យក្រសួងការពារជាតិរុស្ស៊ី លោកឧត្តមសេនីយឯក Igor Konashenkov បាននិយាយកាលពីថ្ងៃអាទិត្យថា កងកម្លាំងរុស្ស៊ីបានវាយប្រហាររោងចក្រសេរ៉ាមិចមួយនៅទីក្រុងស្លូវយ៉ានស្ក៍ ដោយបានសម្លាប់ទាហានអ៊ុយក្រែនដល់ទៅ ១០០នាក់ និងបានបំផ្លាញគ្រាប់រំសេវសម្រាប់កាំភ្លើងធំអាមេរិក។
លោកបាននិយាយថា «ការវាយប្រហារដោយអាវុធដែលមានភាពជាក់លាក់ខ្ពស់មួយត្រូវបានធ្វើឡើងនៅមូលដ្ឋានបណ្តោះអាសន្ននៃកងកាំភ្លើងធំអ៊ុយក្រែន និងឃ្លាំងរំសេវដែលមានទីតាំងនៅរោងចក្រសេរ៉ាមិចមួយក្នុងទីក្រុងស្លូវយ៉ានស្ក៍។ នៅក្នុងការវាយប្រហារនេះបានសម្លាប់ទាហានរហូតដល់ ១០០នាក់ និងបានបំផ្លាញជាង ១ ០០០ជុំនៃគ្រាប់រំសេវកាំភ្លើង M777 ដែលផលិតដោយសហរដ្ឋអាមេរិក»។
អ្នកនាំពាក្យរូបនេះបាននិយាយថាផងដែរថា គ្រាប់រ៉ុក្កែតប្រហែល ១០០គ្រាប់សម្រាប់ Grad MLRS ក៏ត្រូវបានបំផ្លាញដែរ៕
ប្រភព៖ ក្រសួងព័ត៌មាន
