បរទេស៖ នេះបើយោងតាមការចេញផ្សាយរបស់សារព័ត៌មាន TASS បានអោយដឹងថាបណ្តាមេដឹកនាំក្រុមប្រទេស G7 បានបង្ហាញពីការតាំងចិត្តរបស់ពួកគេថា ប្រទេសរុស្ស៊ីមិនត្រូវឈ្នះនៅក្នុងសង្គ្រាមក្នុងប្រទេសអ៊ុយក្រែនទេ។ នេះបើយោងតាមសេចក្តីថ្លែងការណ៍របស់ក្រុមប្រទេស G7 ដែលបានចេញផ្សាយកាលពីថ្ងៃអាទិត្យ។
សេចក្តីថ្លែងការណ៍បានសរសេរថា ក្រុមប្រទេស G7 និងអ៊ុយក្រែនតែងមានគោលជំហររួបរួមគ្នាក្នុងគ្រាដ៏លំបាកនេះ ហើយដើម្បីធានាបាននូវអនាគតប្រកបដោយលទ្ធិប្រជាធិបតេយ្យ និងវិបុលភាពសម្រាប់ប្រទេសអ៊ុយក្រែន។ យើងនៅតែរួបរួមគ្នាក្នុងការតាំងចិត្តរបស់យើងដែលថា ប្រធានាធិបតីរុស្ស៊ី លោក ពូទីន មិនអាចឈ្នះសង្គ្រាមរបស់លោកប្រឆាំងនឹងអ៊ុយក្រែនទេ។ យើងនៅចងចាំចំពោះអ្នកទាំងអស់ដែលបានប្រយុទ្ធប្រឆាំងដើម្បីសេរីភាពកាលពីក្នុងសង្គ្រាមលោកលើកទីពីរ ហើយនៅពេលនេះយើងនៅតែបន្តការតស៊ូដើម្បីវានៅថ្ងៃនេះ សម្រាប់ប្រជាជនអ៊ុយក្រែន សម្រាប់អឺរ៉ុប និងសម្រាប់សហគមន៍ពិភពលោក។
កាលពីថ្ងៃទី២៤ ខែកុម្ភៈ ប្រធានាធិបតីរុស្ស៊ី លោក វ្ល៉ាឌីមៀរ ពូទីន បានប្រកាសពីប្រតិបត្តិការយោធាពិសេសមួយដើម្បីឆ្លើយតបនឹងសំណើសុំជំនួយពីប្រមុខនៃសាធារណរដ្ឋប្រជាមានិតដុនបាសស៍។ លោកបានសង្កត់ធ្ងន់ថា ទីក្រុងមូស្គូមិនមានផែនការកាន់កាប់ទឹកដីអ៊ុយក្រែនទេ។ បន្ទាប់ពីការអនុវត្តនេះ សហរដ្ឋអាមេរិក និងសម្ព័ន្ធមិត្តបានដាក់ទណ្ឌកម្មទ្រង់ទ្រាយធំទៅលើប្រទេសរុស្ស៊ី ហើយបានចាប់ផ្តើមផ្គត់ផ្គង់អាវុធដល់ប្រទេសអ៊ុយក្រែន៕
ប្រភព៖ ក្រសួងព័ត៌មាន
