បរទេស៖ នេះបើយោងតាមការចេញផ្សាយរបស់សារព័ត៌មាន Sputnik បានអោយដឹងថាអ្នកនាំពាក្យរបស់នាយករដ្ឋមន្ត្រីស្រីលង្កា លោក Rohan Weliwita បាននិយាយថា នាយករដ្ឋមន្ត្រីស្រីលង្កា លោក Mahinda Rajapaksa បានលាលែងពីតំណែងហើយ។
អ្នកនាំពាក្យរូបនេះបាននិយាយថា នាយករដ្ឋមន្ត្រីអាយុ ៧៦ឆ្នាំរូបនេះបានផ្ញើលិខិតលាលែងពីតំណែងរបស់លោកទៅកាន់ប្អូនប្រុសរបស់លោកដែលកាន់តំណែងជាប្រធានាធិបតីស្រីលង្កា លោក Gotabaya Rajapaksa ដោយជម្រះផ្លូវសម្រាប់រដ្ឋាភិបាលរួបរួមថ្មីមួយ។
នៅពេលមុននេះ ព័ត៌មានអំពីការលាលែងពីតំណែងរបស់នាយករដ្ឋមន្ត្រីរូបនេះត្រូវបានទម្លាយដោយប្រព័ន្ធផ្សព្វផ្សាយក្នុងស្រុក។
កាលពីថ្ងៃច័ន្ទ រដ្ឋាភិបាលបានដាក់បម្រាមគោចរនៅទូទាំងប្រទេស និងបានដាក់ពង្រាយកងទ័ពនៅក្នុងរដ្ឋធានីកូឡុំបូ ស្របពេលដែលកំពុងមានការប៉ះទង្គិចគ្នាដោយហិង្សារវាងក្រុមអ្នកតវ៉ាប្រឆាំងរដ្ឋាភិបាល និងអ្នកគាំទ្ររដ្ឋាភិបាលនៅខាងក្រៅការិយាល័យលោកប្រធានាធិបតី Gotabaya Rajapaksa ។ មនុស្សរាប់សិបនាក់បានរងរបួសនៅក្នុងការប៉ះទង្គិចគ្នានោះ។ ប៉ូលិសបានប្រើឧស្ម័នបង្ហូរទឹកភ្នែក និងបាញ់ទឹកដើម្បីបំបែកក្រុមបាតុករ។
ប្រទេសស្រីលង្កាបាននិងកំពុងប្រឈមមុខនឹងវិបត្តិសេដ្ឋកិច្ចដ៏អាក្រក់បំផុតចាប់តាំងពីទទួលបានឯករាជ្យពីការគ្រប់គ្រងរបស់អង់គ្លេសកាលពីក្នុងឆ្នាំ១៩៤៨ មក។ ប្រជាជនបាននិងកំពុងទទួលរងនូវកង្វះខាតស្បៀងអាហារ ប្រេងឥន្ធនៈ និងថ្នាំពេទ្យ ក៏ដូចជាការដាច់ភ្លើងជាច្រើនខែ។ វិបត្តិនេះបានផ្ទុះឡើងបន្ទាប់ពីប្រទេសស្រីលង្កាបានបាត់បង់ប្រាក់ចំណូលដ៏សំខាន់ដែលខ្លួនដែលទទួលបានពីទេសចរណ៍ និងការផ្ញើប្រាក់។ វាបានកើតឡើងដោយសារតែការឆ្លងរាលដាលនៃជំងឺរាតត្បាតកូវីដ-១៩ និងការរឹតបន្តឹងដ៏តឹងរ៉ឹងទាក់ទងនឹងជំងឺកូវីដ-១៩ ដែលបានធ្វើឱ្យប៉ះពាល់ដល់តំបន់ទាំងមូល។ ជាលទ្ធផល ប្រទេសស្រីលង្កាមិនអាចសងបំណុលបរទេសចំនួន ៥១ប៊ីលានដុល្លារអាម៉េរិករបស់ខ្លួនបានទៀតទេ និងបានហាមឃាត់ការនាំចូលទំនិញមួយចំនួន៕
ប្រភព៖ ក្រសួងព័ត៌មាន
