បរទេស៖ នេះបើយោងតាមការចេញផ្សាយរបស់សារព័ត៌មាន TASS បានអោយដឹងថានាយករដ្ឋមន្ត្រីនៃប្រទេសឥណ្ឌា និងបណ្តានាយករដ្ឋមន្ត្រីនៃប្រទេសនៅអឺរ៉ុបខាងជើងជឿថា ការបញ្ឈប់ជាបន្ទាន់នូវអរិភាពក្នុងប្រទេសអ៊ុយក្រែនគឺជាការចាំបាច់។ នេះបើយោងតាមសេចក្តីថ្លែងការណ៍រួមដែលបានអនុម័តបន្ទាប់ពីកិច្ចប្រជុំកំពូលនៅទីក្រុង Copenhagen ។
សេចក្តីថ្លែងការណ៍ដែលបានចេញផ្សាយនៅលើគេហទំព័ររបស់ក្រសួងការបរទេសឥណ្ឌាបាននិយាយថា «បណ្តានាយករដ្ឋមន្ត្រីទាំងនោះបានសម្តែងការព្រួយបារម្ភយ៉ាងធ្ងន់ធ្ងរអំពីវិបត្តិមនុស្សធម៌ដែលកំពុងកើតមាននៅក្នុងប្រទេសអ៊ុយក្រែន។ ពួកគេបានថ្កោលទោសយ៉ាងដាច់អហង្ការចំពោះការស្លាប់ជនស៊ីវិលនៅក្នុងប្រទេសអ៊ុយក្រែន។ ពួកគេបានរំលឹកឡើងវិញនូវតម្រូវការសម្រាប់ការបញ្ឈប់ជាបន្ទាន់នូវអរិភាពនេះ»។
សេចក្តីថ្លែងការណ៍នោះបានចង្អុលបង្ហាញថា សណ្តាប់ធ្នាប់ពិភពលោកទំនើបត្រូវបានបង្កើតឡើងនៅលើធម្មនុញ្ញអង្គការសហប្រជាជាតិ ច្បាប់អន្តរជាតិ និងការគោរពចំពោះអធិបតេយ្យភាព និងបូរណភាពទឹកដីនៃរដ្ឋនានា។
សេចក្តីថ្លែងការណ៍បាននិយាយថា «ភាគីទាំងអស់បានពិភាក្សាគ្នាអំពីឥទ្ធិពលអស្ថេរភាពនៃជម្លោះនៅក្នុងប្រទេសអ៊ុយក្រែន និងផលប៉ះពាល់ក្នុងតំបន់ និងសកលលោកទាំងមូល»។
កិច្ចប្រជុំនោះមានការចូលរួមពីនាយករដ្ឋមន្ត្រីឥណ្ឌា លោក ណារេនដ្រា ម៉ូឌី នាយករដ្ឋមន្ត្រីន័រវេស លោក ចូណាស់ ហ្កាហ៍ ស្តូរ នាយករដ្ឋមន្ត្រីស៊ុយអែត លោកស្រី មេកដាឡេណា អេនដឺសុន នាយករដ្ឋមន្ត្រីអ៊ីស្លង់ លោកស្រី កាទ្រីន ចាកូបស្តូតទៀរ នាយករដ្ឋមន្ត្រីហ្វាំងឡង់ លោកស្រី សាន់ណា ម៉ារីន និងនាយករដ្ឋមន្ត្រី ដាណឺម៉ាក លោកស្រី មេតត៍ ហ្វ្រេដឺរីកសិន ៕
ប្រភព៖ ក្រសួងព័ត៌មាន
