បរទេស៖ នេះបើយោងតាមការចេញផ្សាយរបស់សារព័ត៌មាន TASS បានអោយដឹងថារដ្ឋមន្ត្រីការបរទេសរុស្ស៊ី លោក ស៊ែរហ្គេយ ឡាវរ៉ូវ បាននិយាយនៅក្នុងអត្ថបទមួយដែលចេញផ្សាយដោយសារព័ត៌មាន Rossiyskaya Gazeta កាលពីថ្ងៃព្រហស្បតិ៍ថា ប្រទេសរុស្ស៊ីកំពុងស្វែងរកការរក្សាទំនាក់ទំនងល្អ និងប្រកបដោយការស្ថាបនាជាមួយបណ្តាប្រទេសទាំងអស់ ជាពិសេសជាមួយបណ្តាប្រទេសជិតខាងរបស់ខ្លួន។
អ្នកការទូតរូបនេះបាននិយាយនៅក្នុងអត្ថបទមួយដែលចុះផ្សាយដោយសារព័ត៌មានរុស្ស៊ីនៅក្នុងពិធីអបអរសាទរខួបលើកទី៣០ នៃទំនាក់ទំនងការទូតជាមួយតំបន់អាស៊ីកណ្តាលថា «ក្នុងនាមជាសមាជិកដ៏គួរឱ្យទុកចិត្តនៃសហគមន៍អន្តរជាតិ ប្រទេសរុស្ស៊ីកំពុងស្វែងរកបរិយាកាសខាងក្រៅប្រកបដោយភាពសប្បុរស ខណៈដែលនៅតែជាប្រទេសជិតខាងល្អ និងរក្សានូវកិច្ចសហប្រតិបត្តិការប្រកបដោយការស្ថាបនាជាមួយប្រទេសទាំងអស់ ជាពិសេសជាមួយបណ្តាប្រទេសជិតខាង។ យើងមានភាពសោមន្សសចំពោះភាពជាដៃគូយុទ្ធសាស្ត្រជាមួយបណ្តាប្រទេសនៅតំបន់អាស៊ីកណ្តាល ដោយភាគច្រើនជាប្រទេសសម្ព័ន្ធមិត្តរបស់យើង»។
លោក ឡាវរ៉ូវ បាននិយាយថា ទីក្រុងមូស្គូបានចូលរួមក្នុងរបៀបវារៈដ៏មមាញឹកជាមួយបណ្តាប្រទេសនៅអាស៊ីកណ្តាលដើម្បីអបអរសាទរខួបនេះ។ លោក ឡាវរ៉ូវ បានសង្កត់ធ្ងន់ថា ប្រទេសរុស្ស៊ីក៏មើលឃើញនូវការកើនឡើងយ៉ាងខ្លាំងនៃវិស័យពាណិជ្ជកម្មរបស់ខ្លួនជាមួយតំបន់អាស៊ីកណ្តាលដែរ បើទោះបីជាស្ថានភាពភូមិសាស្ត្រនយោបាយមានភាពច្របូកច្របល់ក៏ដោយ។ លោកបាននិយាយបន្ថែមថា «វិស័យពាណិជ្ជកម្មកំពុងមានការកើនឡើងជាមួយស្ទើរតែគ្រប់ប្រទេសក្នុងតំបន់» ដោយលោកបាននិយាយបន្ថែម ថាក្រៅពីទំនិញ ក៏មានការកើនឡើងពាក់ព័ន្ធនឹងវិស័យកសិកម្ម គីមី ផលិតផលប្រេង ឱសថ លោហធាតុ រថយន្ត និងសម្ភារៈផងដែរ។
អ្នកការទូតកំពូលរុស្ស៊ីរូបនេះបាននិយាយថា «នៅចន្លោះរវាងឆ្នាំ២០១០ និងឆ្នាំ២០២១ ការវិនិយោគរបស់រុស្ស៊ីដែលប្រមូលបានមានចំនួនប្រហែល ៣០,៥ប៊ីលានដុល្លារអាម៉េរិក។ មានក្រុមហ៊ុនរុស្ស៊ី និងក្រុមហ៊ុនបណ្តាក់ទុនសកម្មនៅក្នុងបណ្តាប្រទេសអាស៊ីកណ្តាលប្រមាណ ១០ ០០០ក្រុមហ៊ុន ដែលបង្កើតការងារបាន ៩០០០០០កន្លែង»៕
ប្រភព៖ ក្រសួងព័ត៌មាន
