បរទេស៖ នេះបើយោងតាមការចេញផ្សាយរបស់សារព័ត៌មាន TASS បានអោយដឹងថាកញ្ចប់បន្ទាប់នៃជំនួយយោធារបស់អង់គ្លេសដល់អ៊ុយក្រែននឹងរួមបញ្ចូលនូវឧបករណ៍អេឡិចត្រូនិកសម្រាប់សង្គ្រាម ជាពិសេសឧបករណ៍ GPS ប្រព័ន្ធរ៉ាដាប្រឆាំងអាគុយ ក៏ដូចជាឧបករណ៍សម្រាប់មើលនៅពេលយប់។ នេះបើយោងតាមសេចក្តីថ្លែងការណ៍របស់នាយករដ្ឋមន្ត្រីអង់គ្លេស លោក បូរីស ចនសុនឲ ដែលបានចេញផ្សាយកាលពីថ្ងៃចន្ទ។
ថ្លែងតាមរយៈតំណភ្ជាប់វីដេអូទៅកាន់សភាកាលពីថ្ងៃអង្គារ ប្រមុខរដ្ឋាភិបាលអង់គ្លេសនឹងលម្អិតអំពីអ្វីដែលត្រូវបានរួមបញ្ចូលនៅក្នុងកញ្ចប់ជំនួយដែលមានតម្លៃ ៣៧៥លានដុល្លារអាម៉េរិក។
សេចក្តីថ្លែងការណ៍នោះបាននិយាយថា «ចក្រភពអង់គ្លេសក៏នឹងបញ្ជូនប្រព័ន្ធលើកទម្ងន់ធ្ងន់នៅប៉ុន្មានសប្តាហ៍ខាងមុខនេះ ដើម្បីផ្តល់ការគាំទ្រផ្នែកដឹកជញ្ជូនដល់កងកម្លាំង និងរថយន្ត Toyota Landcruisers ឯកទេសថ្មីជាងដប់គ្រឿង ដើម្បីជួយការពារមន្ត្រីស៊ីវិលនៅភាគខាងកើតអ៊ុយក្រែន និងជម្លៀសជនស៊ីវិលចេញពីតំបន់ជួរមុខ តាមការស្នើសុំពីរដ្ឋាភិបាលអ៊ុយក្រែន»។
កាលពីថ្ងៃទី២៤ ខែកុម្ភៈ លោក ពូទីន បាននិយាយនៅក្នុងសុន្ទរកថាមួយតាមទូរទស្សន៍កាលពីថ្ងៃទី២៤ ខែកុម្ភៈថា ជាការឆ្លើយតបទៅនឹងសំណើរបស់ប្រមុខនៃសាធារណរដ្ឋដុនបាសស៍ លោកបានធ្វើការសម្រេចចិត្តដើម្បីធ្វើប្រតិបត្តិការយោធាពិសេសមួយនៅអ៊ុយក្រែន។ មេដឹកនាំរុស្ស៊ីបានសង្កត់ធ្ងន់ថា ទីក្រុងមូស្គូគ្មានផែនការកាន់កាប់ទឹកដីអ៊ុយក្រែនទេ។ បន្ទាប់ពីនោះមក សហរដ្ឋអាមេរិក សហភាពអឺរ៉ុប ចក្រភពអង់គ្លេស និងរដ្ឋមួយចំនួនទៀតបានប្រកាសថានឹងដាក់ទណ្ឌកម្មប្រឆាំងនឹងនីតិបុគ្គល និងរូបវ័ន្តបុគ្គលរុស្ស៊ី។ ពួកគេក៏បានបង្កើនការផ្គត់ផ្គង់អាវុធដល់អាជ្ញាធរអ៊ុយក្រែនផងដែរ៕
ប្រភព៖ ក្រសួងព័ត៌មាន
