បរទេស៖ នេះបើយោងតាមការចេញផ្សាយរបស់សារព័ត៌មាន TASS បានអោយដឹងថាអធិការបតីអាល្លឺម៉ង់ លោក Olaf Scholz បាននិយាយនៅក្នុងបទសម្ភាសន៍មួយជាមួយកាសែត The Indian Express ដែលបានចេញផ្សាយកាលពីថ្ងៃចន្ទថា សហភាពអឺរ៉ុបនឹងបញ្ឈប់ការនាំចូលធ្យូងថ្មពីប្រទេសរុស្ស៊ីនៅរដូវក្តៅឆ្នាំនេះ ហើយនឹងលុបចោលនូវការនាំចូលប្រេងពីរុស្ស៊ីនៅចុងឆ្នាំ២០២២។
អធិការបតីរូបនេះបាននិយាយថា សហភាពអឺរ៉ុបបានអនុម័តរួមជាមួយនឹងដៃគូក្នុងតំបន់អាត្លង់ទិករបស់ខ្លួននូវ «ទណ្ឌកម្មដែលមិនធ្លាប់មានពីមុនមកប្រឆាំងនឹងសហព័ន្ធរុស្ស៊ី»។ លោកបានកត់សម្គាល់ថា «ប្រទេសជាច្រើនបានចូលរួមក្នុងការដាក់ទណ្ឌកម្មទាំងនេះ បើទោះបីជាវាមានភាពចាំបាច់ក្នុងការបញ្ជាក់ពីការប៉ះពាល់ដល់វិស័យសេដ្ឋកិច្ចសម្រាប់ខ្លួនយើងក៏ដោយ»។
លោក Scholz បាននិយាយថា «ឥឡូវនេះ យើងកំពុងអនុវត្តគោលនយោបាយដ៏មានមហិច្ឆិតាមួយដើម្បីកាត់បន្ថយការពឹងផ្អែករបស់យើងលើការនាំចូលឥន្ធនៈហ្វូស៊ីលពីប្រទេសរុស្ស៊ី។ យើងនឹងបញ្ឈប់ការនាំចូលធ្យូងថ្មរបស់រុស្ស៊ីនៅរដូវក្តៅនេះ ហើយយើងនឹងបញ្ឈប់ការនាំចូលប្រេងពីរុស្ស៊ីបន្តិចម្តងៗរហូតដល់ចុងឆ្នាំ ហើយនឹងកាត់បន្ថយឱ្យបានច្រើនចំពោះការនាំចូលឧស្ម័នពីរុស្ស៊ីផងដែរ»៕
ប្រភព៖ ក្រសួងព័ត៌មាន
