បរទេស៖ អាកាសយានដ្ឋាន Changi របស់ប្រទេសសឹង្ហបុរីត្រូវបានគ្រងដំណែងជាអាកាសយានដ្ឋានល្អបំផុតរបស់ពិភពលោកក្នុងរយៈពេល ១៥ឆ្នាំជាប់ៗគ្នាមុនពេលមានជំងឺរាតត្បាតកូវីដ-១៩ ដោយសារតែការផ្តល់ជូនដល់អ្នកដំណើរដ៏ល្អឥតខ្ចោះ និងសេវាកម្មអតិថិជនដែលមានបច្ចេកវិទ្យាខ្ពស់។ ឥឡូវនេះ អាកាសយានដ្ឋាននេះបានត្រៀមខ្លួនរួចជាស្រេចដើម្បីស្វាគមន៍អ្នកទេសចរដែលត្រលប់មកវិញដោយសង្ឃឹមថា ការកែលម្អថ្មីដែលបានធ្វើឡើងក្នុងអំឡុងពេលមានជំងឺរាតត្បាតកន្លងមកនឹងពង្រឹងឋានៈរបស់ខ្លួនជាមជ្ឈមណ្ឌលអាកាសចរណ៍ឈានមុខគេរបស់អាស៊ី។
សិង្ហបុរី គឺជាប្រទេសដំបូងគេក្នុងទ្វីបអាស៊ីដែលចាប់ផ្តើមបន្ធូរបន្ថយវិធានការរឹតបន្តឹងចំពោះការធ្វើដំណើរ ដោយបានបង្កើតផ្លូវធ្វើដំណើរសម្រាប់អ្នកដែលបានចាក់វ៉ាក់សាំងរួច ដែលទីបំផុតបានអនុញ្ញាតឱ្យអ្នកដំណើរមកពី ៣២ប្រទេសចូលទៅក្នុងប្រទេសនេះដោយមិនចាំបាច់ធ្វើចត្តាឡីស័ក។ ចាប់ពីខែមេសានេះទៅ រដ្ឋកោះមួយនេះត្រូវបានបើកសម្រាប់អ្នកដំណើរទាំងអស់ដែលបានចាក់វ៉ាក់សាំងពេញលេញទាំងស្រុងដោយមិនគិតពីប្រទេសដែលពួកគេមកពីនោះទេ។
ខណៈពេលដែលកំពុងរង់ចាំរឿងនេះ អាកាសយានដ្ឋាន Changi កំពុងធ្វើការកែសម្រួល បញ្ជរ Check-in និងការដាក់ឥវ៉ាន់ដោយខ្លួនឯង ឥឡូវនេះអាចដំណើរការបានហើយនៅពេលដែលអ្នកដំណើរដាក់ស្កេនម្រាមដៃរបស់ពួកគេនៅលើអេក្រង់។ អ្នកដំណើរអាចប្រើច្រកទ្វារអន្តោប្រវេសន៍ស្វ័យប្រវត្តិ ដែលស្កែនមុខ និងភ្នែក ប្រសិនបើជីវមាត្រទាំងនោះត្រូវបានចុះឈ្មោះក្នុងលិខិតឆ្លងដែន។ ម៉ាស៊ីនត្រជាក់ និងខ្យល់ចេញចូលមេកានិចត្រូវបានដំឡើងជាមួយនឹងតម្រងកម្រិតមន្ទីរពេទ្យ និងប្រព័ន្ធអនាម័យអ៊ុលត្រាវីយូឡេត ហើយមនុស្សយន្តសម្រាប់សម្អាតស្វយ័តត្រូវបានប្រើប្រាស់ដើម្បីសម្លាប់មេរោគនៅលើកម្រាលព្រំ។
អ្នកដំណើរកំពុងវិលត្រលប់ទៅវិញបន្តិចម្តងៗហើយ។ អាកាសយានដ្ឋាន Changi បានទទួលអ្នកដំណើរចំនួន ១,៤២លាននាក់ក្នុងរយៈពេលពីរខែដំបូងនៃឆ្នាំនេះ ដែលកើនឡើងពីចំនួន ២៦៣ ០០០នាក់ក្នុងរយៈពេលដូចគ្នាកាលពីឆ្នាំមុន។
ទោះបីជាយ៉ាងណាក៏ដោយ ខណៈដែលក្រុមហ៊ុនអាកាសចរណ៍ចំនួន៨១ ក្នុងចំណោមក្រុមហ៊ុនអាកាសចរណ៍ចំនួន៩១ ដែលធ្លាប់ហោះហើរទៅកាន់អាកាសយានដ្ឋាន Changi បានបើកប្រតិបត្តិការសេវាកម្មរបស់ពួកគេឡើងវិញ ប៉ុន្តែការហោះហើរមានត្រឹមតែ ៣៧ភាគរយនៃកម្រិតមុនមានជំងឺរាតត្បាតប៉ុណ្ណោះ។ កាលពីឆ្នាំមុន អាកាសយានដ្ឋាននេះបានស្វាគមន៍អ្នកដំណើរចំនួន ៣,០៥លាននាក់ដោយធ្លាក់ចុះពីចំនួន ៦៨លាននាក់កាលពីក្នុងឆ្នាំ២០១៩ មុនពេលដែលប្រទេសនានាបិទព្រំដែនរបស់ពួកគេ៕
ប្រភព៖ ក្រសួងព័ត៌មាន
