បរទេស៖ នេះបើយោងតាមការចេញផ្សាយរបស់សារព័ត៌មាន RT នៅថ្ងៃទី១៧ ខែមេសា ឆ្នាំ២០២២ បានអោយដឹងថាលោក Karl von Rohr អនុប្រធានធនាគារ Deutsche Bank បានប្រាប់កាសែត Frankfurter Allgemeine ថា តម្លៃទំនិញប្រើប្រាស់ក្នុងប្រទេសអាល្លឺម៉ង់នឹងកើនឡើង ៧-៨% នៅឆ្នាំ២០២២។ ទោះជាយ៉ាងណាក៏ដោយ ប្រសិនបើរដ្ឋាភិបាលដាក់ដាក់បំរាមលើការនាំចូលថាមពលរបស់រុស្ស៊ី តម្លៃអាចនឹងកើនឡើង ១០% ឬច្រើនជាងនេះនៅក្នុងប៉ុន្មានខែខាងមុខនេះ។
លោក Karl von Rohr បាននិយាយថា “ប្រសិនបើការនាំចូលថាមពលត្រូវបានដាក់បំរាមកាន់តែច្រើន យើងប្រហែលជាឃើញការកើនឡើងតម្លៃប្រហែល ១០% ឬច្រើនជាងនេះ។ យើងត្រូវតែការពារខ្លួនយើងសម្រាប់អត្រាអតិផរណាដែលមិនបានឃើញចាប់តាំងពីទសវត្សរ៍ឆ្នាំ ១៩៧០” ។
កាលពីខែមុន អត្រាអតិផរណាប្រចាំឆ្នាំក្នុងប្រទេសអាល្លឺម៉ង់បានឡើងដល់កម្រិតខ្ពស់បំផុត ៧,៣%។ តម្លៃអីវ៉ាន់បានឡើងថ្លៃបន្ទាប់ពី EU និងប្រទេសមួយចំនួនផ្សេងទៀតបានដាក់ទណ្ឌកម្មសេដ្ឋកិច្ចលើរុស្ស៊ី ដើម្បីជាការឆ្លើយតបចំពោះប្រតិបត្តិការយោធារបស់ក្រុងម៉ូស្គូនៅអ៊ុយក្រែន។ ទណ្ឌកម្មបានធ្វើឱ្យប៉ះពាល់ដល់ការរំពឹងទុកនៃលំហូរថាមពលដែលមិនមានការរំខានពីប្រទេសរុស្ស៊ីទៅកាន់សហភាពអឺរ៉ុប។ ទោះបីជាក្រុមហ៊ុនផ្តល់ថាមពលរុស្ស៊ីរហូតមកដល់ពេលនេះមិនត្រូវបានប៉ះពាល់ខ្លាំងដោយការរឹតបន្តឹងនេះឡើយ៕
