បរទេស៖ នេះបើយោងតាមការចេញផ្សាយរបស់សារព័ត៌មាន RT នៅថ្ងៃទី១៦ ខែមេសា ឆ្នាំ២០២២ បានអោយដឹងថាអ្នកនាំពាក្យក្រសួងការពារជាតិ ឧត្តមសេនីយឯក Igor Konashenkov បាននិយាយកាលពីថ្ងៃសៅរ៍ថា ប្រទេសរុស្ស៊ីបានធ្វើការវាយប្រហារដោយភាពជាក់លាក់មួយ ដើម្បីបំផ្លាញរោងចក្រផលិតរថពាសដែកក្នុងទីក្រុងគៀវ និងឃ្លាំងជួសជុលយោធានៅទីក្រុង Nikolaev ភាគខាងត្បូងប្រទេសអ៊ុយក្រែន។
លោកបានបន្ថែមថា គោលដៅចំនួន ១៦កន្លែង ត្រូវបានវាយប្រហារពេញមួយយប់ រួមមានអង្គភាពយោធាអ៊ុយក្រែន ឃ្លាំងអាវុធ គ្រាប់រំសេវ និងកន្លែងរ៉ាដា។
ទីក្រុងមូស្គូបានព្រមានថា ខ្លួននឹងបង្កើនការវាយប្រហារលើទីក្រុងគៀវ បន្ទាប់ពីបានចោទប្រកាន់អ៊ុយក្រែនថាបានបាញ់ផ្លោងលើទឹកដីរុស្ស៊ីកាលពីថ្ងៃព្រហស្បតិ៍។ ក្នុងនោះដែរ ខាងក្រុងកៀវបានបដិសេធ ចំពោះការវាយប្រហារលើដីរុស្ស៊ីមួយនេះ៕
