បរទេស៖ នេះបើយោងតាមការចេញផ្សាយរបស់សារព័ត៌មាន RT នៅថ្ងៃទី៩ ខែមេសា ឆ្នាំ២០២២ បានអោយដឹងថាលោក Anatoly Antonov ឯកអគ្គរដ្ឋទូតរបស់ទីក្រុងមូស្គូប្រចាំនៅវ៉ាស៊ីនតោន បាននិយាយនៅដើមសប្តាហ៍នេះថា តាមរយៈការផ្តល់សព្វាវុធចូលទៅក្នុងអ៊ុយក្រែន ពីសំណាក់ប្រទេសលោកខាងលិច វាអាចជាហានិភ័យមួយដែលធ្វើអោយសហរដ្ឋអាមេរិក និងរុស្ស៊ី “ឈានដល់ការប្រឈមមុខដាក់គ្នាខាងយោធា” ។
ចាប់តាំងពីការចាប់ផ្តើមនៃការវាយលុកយោធារបស់រុស្ស៊ីនៅអ៊ុយក្រែន បណ្តាប្រទេសណាតូ និងសម្ព័ន្ធមិត្តរបស់ពួកគេបានបដិសេធពីការចូលរួមផ្នែកយោធាដោយផ្ទាល់នៅក្នុងជម្លោះ ប៉ុន្តែពួកគេបាននិងកំពុងផ្តល់អាវុធ និងគ្រាប់រំសេវដល់ទីក្រុងកៀវយ៉ាងសកម្ម។ តាមរយៈការធ្វើដូច្នេះ លោកឯកអគ្គរដ្ឋទូតបាននិយាយនៅក្នុងបទសម្ភាសន៍ជាមួយ Newsweek ថារដ្ឋលោកខាងលិចគឺ “ពាក់ព័ន្ធដោយផ្ទាល់នៅក្នុងព្រឹត្តិការណ៍បច្ចុប្បន្ន” និងកំពុងញុះញង់អោយមាន “ការបង្ហូរឈាមបន្ថែមទៀត”។ លោក Antonov បានហៅសកម្មភាពទាំងនេះថាជា “គ្រោះថ្នាក់” និងការ “បង្កហេតុ” ។
លោកបន្ថែមថា “សកម្មភាពពួកគេអាចធ្វើអោយសហរដ្ឋអាមេរិក និងសហព័ន្ធរុស្ស៊ីដើរទៅកាន់ផ្លូវនៃការប្រឈមមុខដាក់គ្នាខាងយោធាដោយផ្ទាល់។ រាល់ការផ្គត់ផ្គង់ជាសព្វាវុធ និងសម្ភារៈយោធាពីលោកខាងលិច ដែលធ្វើឡើងដោយក្បួនដឹកជញ្ជូនទៅកាន់ទឹកដីអ៊ុយក្រែន គឺជាគោលដៅយោធាស្របច្បាប់សម្រាប់កងកម្លាំងប្រដាប់អាវុធ”។
កាលពីពីរថ្ងៃមុន រដ្ឋមន្ត្រីការបរទេសអ៊ុយក្រែន លោក Dmitry Kuleba បានជំរុញឱ្យប្រទេសណាតូ បន្តផ្តល់ “អាវុធបន្ថែមទៀត” ដល់ក្រុងកៀវ ដោយពន្យល់ថា តាមរយៈការប្រយុទ្ធជាមួយរុស្ស៊ី គឺអ៊ុយក្រែនមិនត្រឹមតែការពារខ្លួនប៉ុណ្ណោះទេ ប៉ុន្តែថែមទាំងពង្រឹងសន្តិសុខរបស់សមាជិកប្លុកផងដែរ៕
