បរទេស៖ នេះបើយោងតាមការចេញផ្សាយរបស់សារព័ត៌មាន RT នៅថ្ងៃទី២៩ ខែមីនា ឆ្នាំ២០២២ បានអោយដឹងថា សមាជិកចំនួនប្រាំបីនាក់នៃ MONUSCO ដែលជាបេសកកម្មរក្សាសន្តិភាពរបស់អង្គការសហប្រជាជាតិនៅសាធារណរដ្ឋប្រជាធិបតេយ្យកុងហ្គោ បានស្លាប់នៅពេលដែលឧទ្ធម្ភាគចក្ររបស់ពួកគេបានធ្លាក់នៅជិតព្រំដែនជាមួយប្រទេស Rwanda កាលពីថ្ងៃអង្គារ។ យោធាកុងហ្គោបានចោទប្រកាន់ក្រុមសកម្មប្រយុទ្ធចលនាថាបានបាញ់ទម្លាក់ឧទ្ធម្ភាគចក្រ ប់ូន្តែក្រុមឧទ្ទាមបានធ្វើការបដិសេធ។
MONUSCO បាននិយាយថា ឧទ្ធម្ភាគចក្រប៉ាគីស្ថានដែលមានលេខកន្ទុយ ៨១០ ស្ថិតនៅលើជើងហោះហើរឈ្លបយកការណ៍ពីលើតំបន់ Tshanzu ក្នុងខេត្ត North Kivu ជិតព្រំដែនជាមួយប្រទេស Rwanda និង Uganda ។ នេះបើយោងតាមសេចក្តីថ្លែងការណ៍របស់អ្នកនាំពាក្យយោធាកុងហ្គោលោកឧត្តមសេនីយ៍ Sylvain Ekeng បានអោយដឹងថាយន្តហោះខាងលើបានធ្លាក់ចុះកាលពីថ្ងៃអង្គារនៅក្នុងទឹកដី ដែលគ្រប់គ្រងដោយពួកឧទ្ទាមដែលត្រូវបានគេស្គាល់ថា M23៕
