បរទេស៖ នេះបើយោងតាមការចេញផ្សាយរបស់សារព័ត៌មាន RT នៅថ្ងៃទី២៧ ខែមីនា ឆ្នាំ២០២២ បានអោយដឹងថាការប្តូរទៅជាប្រាក់ “រូប” សម្រាប់ការទូទាត់ឧស្ម័នដែលត្រូវបានប្រកាសកាលពីដើមសប្តាហ៍នេះដោយប្រធានាធិបតីរុស្ស៊ីលោកវ្ល៉ាឌីមៀ ពូទីន នឹងបង្ខំអោយសហភាពអឺរ៉ុបមិនដាក់ទណ្ឌកម្មប្រឆាំងនឹងរុស្ស៊ី ប្រសិនបើខ្លួនចង់រក្សាឧស្ម័នឱ្យហូរចូល។
យោងតាមសេដ្ឋវិទូ Düsseldorf លោក Jens Südekum បានអោយដឹងថា ដើម្បីទូទាត់ថ្លៃដឹកជញ្ជូនឧស្ម័ន អឺរ៉ុបនឹងត្រូវទិញប្រាក់ “រូប” ពីធនាគារកណ្តាលនៃប្រទេសរុស្ស៊ី ដែលកាលពីដើមខែនេះត្រូវបានដាក់ក្នុងបញ្ជីទណ្ឌកម្មរបស់សហភាពអឺរ៉ុប។ វិធានការនេះហាមឃាត់រាល់ប្រតិបត្តិការហិរញ្ញវត្ថុរវាងនិយតករហិរញ្ញវត្ថុរុស្ស៊ី និងសហភាពអឺរ៉ុប៕
