បរទេស៖ នេះបើយោងតាមការចេញផ្សាយរបស់សារព័ត៌មាន RT នៅថ្ងៃទី២៥ ខែមីនា ឆ្នាំ២០២២ ក្រសួងការពារជាតិរុស្សី បានផ្តល់ព័ត៌មានថ្មីៗដ៏កម្រមួយ ស្តីពីការស្លាប់ និងរបួស ដែលកងកម្លាំងប្រដាប់អាវុធរបស់ប្រទេសនេះ បានទទួលរងគ្រោះ អំឡុងពេលការវាយលុកយោធាដែលកំពុងបន្តនៅក្នុងប្រទេសអ៊ុយក្រែន កាលពីថ្ងៃសុក្រ។
លោកវរសេនីយ៍ឯក Sergey Rudskoy អនុប្រធានអគ្គសេនាធិការរុស្ស៊ីបានប្រាប់សន្និសីទសារព័ត៌មានខ្លីមួយ ថា “ជាអកុសល ក្នុងអំឡុងពេលប្រតិបត្តិការយោធាពិសេស មានការខាតបង់ក្នុងចំណោមសមមិត្តរួមអាវុធរបស់យើង។ រហូតមកដល់ពេលនេះ មានទាហាន ១៣៥១ នាក់បានស្លាប់ និង ៣៨២៥ នាក់បានរងរបួស” ។
មន្ត្រីរូបនេះមិនបានផ្តល់តួលេខណាមួយអំពីទាហានដែលអាចបាត់ខ្លួនក្នុងសកម្មភាព ឬត្រូវបានចាប់ខ្លួនជាអ្នកទោសចំពេលមានជម្លោះនោះទេ។ លោក Sergey Rudskoy បានបញ្ជាក់យ៉ាងច្បាស់ថាភាគីអ៊ុយក្រែនបានរងការខូចខាតយ៉ាងធ្ងន់ធ្ងរ (ប្រហែល ៣០០០០នាក់) ក្នុងរយៈពេលមួយខែកន្លងមកនេះ។ យោងតាមការប៉ាន់ប្រមាណរបស់យោធារុស្ស៊ី ទាហានអ៊ុយក្រែនប្រហែល ១៤០០០ នាក់ត្រូវបានសម្លាប់ និង ១៦០០០ នាក់ទៀតបានរងរបួស។
លោកបានបន្ថែមថា យោធាអ៊ុយក្រែនបានបន្តការខាតបង់យ៉ាងច្រើនចំពោះសព្វាវុធ ដោយមានរថក្រោះជិត ១៦០០ គ្រឿង និងរថពាសដែកផ្សេងទៀតត្រូវបានបំផ្លាញ។ ដោយលោកបានបន្ថែមថា ការវាយលុករបស់រុស្ស៊ីបានបំផ្លាញកងទ័ពអាកាស និងប្រព័ន្ធប្រឆាំងយន្តហោះរបស់ Kiev យ៉ាងច្រើន៕
