បរទេស៖ នេះបើយោងតាមការចេញផ្សាយរបស់សារព័ត៌មាន RT នៅថ្ងៃទី២៣ ខែមីនា ឆ្នាំ២០២២ បានអោយដឹងថាឧបនាយករដ្ឋមន្ត្រីរុស្ស៊ី និងជាអតីតរដ្ឋមន្ត្រីថាមពល លោក Alexander Novak បាននិយាយកាលពីថ្ងៃពុធថា ការកើនឡើងនៃតម្លៃឧស្ម័ននៅអឺរ៉ុបក្នុងកម្រិត ៤០០០ ដុល្លារក្នុង ១០០០ ម៉ែត្រគូប នៅមិនទាន់បញ្ចប់នោះទេ ដោយសារតែបរិមាណឧស្ម័ននៅក្នុងកន្លែងស្តុកទុក គឺតិចជាងឆ្នាំមុនយ៉ាងច្រើន។
លោកបានបញ្ជាក់ថា ការហាមប្រាមលើការនាំចូលប្រេង និងឧស្ម័នរបស់រុស្ស៊ីអាចបណ្តាលឱ្យមានការគាំងទីផ្សារថាមពលរបស់អឺរ៉ុប។ លោកបានបន្ថែមទៀតថា “វាច្បាស់ណាស់ថា បើគ្មានអ៊ីដ្រូកាបូនរបស់រុស្ស៊ី ប្រសិនបើទណ្ឌកម្មត្រូវបានដាក់ នោះទីផ្សារឧស្ម័ន និងប្រេងនឹងដួលរលំ។ ការកើនឡើងនៃតម្លៃសម្រាប់ធនធានថាមពលនឹងមិនអាចទាយទុកជាមុនបាន”។
លោកបានចង្អុលបង្ហាញថា ការហាមប្រាមរបស់ទីក្រុងវ៉ាស៊ីនតោនលើផលិតផលឧស្ម័ន និងប្រេងរបស់រុស្ស៊ី បាននាំឱ្យមានការកើនឡើងនៃតម្លៃប្រេងឥន្ធនៈនៅសហរដ្ឋអាមេរិករួចទៅហើយ គឺដល់ទី ១៩% ។ ទន្ទឹមនឹងនេះចំណែកទីផ្សារនៃធនធានថាមពលក្នុងស្រុកនៅសហរដ្ឋអាមេរិកមានត្រឹមតែ ៣%ប៉ុណ្ណោះ ដែលជាការនាំចេញពីរុស្ស៊ី៕
