បរទេស៖ នេះបើយោងតាមការចេញផ្សាយរបស់សារព័ត៌មាន RT នៅថ្ងៃទី២១ ខែមីនា ឆ្នាំ២០២២នេះ បានអោយដឹងថា ប្រធានាធិបតីអាមេរិកលោក Joe Biden គ្រោងនឹងធ្វើដំណើរទៅកាន់ប្រទេសប៉ូឡូញក្នុងសប្តាហ៍នេះ ដើម្បីពិភាក្សាអំពីកិច្ចខិតខំប្រឹងប្រែងបន្ថែមទៀតដើម្បីគាំទ្រទីក្រុងគៀវ និងដាក់ទណ្ឌកម្មរុស្ស៊ីចំពោះការវាយលុកយោធារបស់ខ្លួននៅក្នុងប្រទេសអ៊ុយក្រែន។
យោងតាមលេខាធិការសារព័ត៌មានសេតវិមានលោកស្រី Jen Psaki បានបញ្ជាក់ថាលោក Joe Biden នឹងជួបជាមួយប្រធានាធិបតីប៉ូឡូញ លោក Andrzej Duda ក្នុងទីក្រុង Warsaw នៅថ្ងៃសុក្រ ដើម្បីពិភាក្សាអំពីវិធីដែលសហរដ្ឋអាមេរិក និងសម្ព័ន្ធមិត្តរបស់ខ្លួន “ឆ្លើយតបទៅនឹងវិបត្តិមនុស្សធម៌ និងសិទ្ធិមនុស្ស ដែលបង្កឡើងដោយសង្គ្រាមរបស់រុស្ស៊ីលើអ៊ុយក្រែន”។
កិច្ចប្រជុំនេះនឹងធ្វើឡើងបន្ទាប់ពីលោក Joe Biden បានធ្វើដំណើរទៅកាន់ទីក្រុងប្រ៊ុចសែល ប្រទេសបែលហ្សិក ដើម្បីជួបជាមួយសម្ព័ន្ធមិត្តរបស់អង្គការណាតូ និងមន្ត្រីសហភាពអឺរ៉ុប ដើម្បី “ពិភាក្សាអំពីកិច្ចខិតខំប្រឹងប្រែងអន្តរជាតិដើម្បីគាំទ្រអ៊ុយក្រែន និងការដាក់ទណ្ឌកម្មយ៉ាងធ្ងន់ធ្ងរ មិនធ្លាប់មានពីមុនមកលើប្រទេសរុស្ស៊ី”៕
