បរទេស៖ នេះបើយោងតាមការចេញផ្សាយរបស់សារព័ត៌មាន RT នៅថ្ងៃទី៥ ខែមីនា ឆ្នាំ២០២២នេះ បានអោយដឹងថាក្រុមហ៊ុនអាកាសចរណ៍ Aeroflot ដែលជាក្រុមហ៊ុនអាកាសចរណ៍ដ៏ធំបំផុតរបស់រុស្ស៊ី គឺត្រូវបានបញ្ឈប់រាល់ជើងហោះហើរអន្តរជាតិរបស់ខ្លួន លើកលែងតែប្រទេសបេឡារុស្ស ដែលជាប់ព្រំដែន ដោយធ្វើតាមការណែនាំរបស់អង្គការឃ្លាំមើលអាកាសចរណ៍របស់ប្រទេសនេះ។
ក្នុងនោះដែរទីភ្នាក់ងារដឹកជញ្ជូនផ្លូវអាកាសសហព័ន្ធរុស្ស៊ីបានអំពាវនាវអោយក្រុមហ៊ុនអាកាសចរណ៍រុស្ស៊ីទាំងអស់ដែលប្រតិបត្តិការយន្តហោះដាក់ជួលបរទេសឱ្យផ្អាកជើងហោះហើរដឹកអ្នកដំណើរ និងដឹកទំនិញទៅបរទេសចាប់ពីថ្ងៃទី៦ ខែមីនា និងពីប្រទេសផ្សេងទៀតទៅកាន់ប្រទេសរុស្ស៊ីចាប់ពីថ្ងៃទី៨ ខែមីនា៕
