បរទេស៖ នេះបើយោងតាមការចេញផ្សាយរបស់សារព័ត៌មាន RT នៅថ្ងៃ៤ ខែមីនា ឆ្នាំ២០២២នេះ បានអោយដឹងថា ប៉ូលីសក្នុងតំបន់បានបញ្ជាក់ថាយ៉ាងហោចណាស់មនុស្ស ៣០នាក់ បានស្លាប់ ខណៈពេលមនុស្សជាច្រើនាក់ផ្សេងទៀតបានរងរបួស ក្នុងហេតុការណ៍បាញ់ប្រហារ និងបំផ្ទុះនៅក្នុងព្រះវីហារអ៊ីស្លាមមួយក្នុងទីក្រុងPeshawar ភាគពាយព្យប្រទេសប៉ាគីស្ថាន ក្បែរព្រំដែនអាហ្វហ្គានីស្ថាន។
ការវាយប្រហារនេះធ្វើឡើងនៅវិហារអ៊ីស្លាម Kucha Risaldar ក្នុងទីក្រុងចាស់របស់ Peshawarនៅពេលដែលអ្នកគោរពបូជាសាសនា Shia កំពុងប្រមូលផ្តុំគ្នាសម្រាប់ការអធិស្ឋានថ្ងៃសុក្រ។
មេប៉ូលិសប្រចាំក្រុងPeshawar លោក Mohammed Ejaz Khan បាននិយាយ មានខ្មាន់កាំភ្លើង ២នាក់បានបាញ់ប្រហារមកលើមន្ត្រីសមត្ថកិច្ចនៅខាងក្រៅអាគារ។
លោក Mohammed Ejaz Khan បានបន្ថែម ក្នុងពេលនោះខ្មាន់កាំភ្លើងម្នាក់បានត្រូវបាញ់សម្លាប់។ ខណៈពេលម្នាក់ទៀតបានចូលទៅកាន់វិហារខាងលើហើយក៏បានធ្វើការបំផ្ទុះឡើង។ ក្នុងវិហារខាងលើ គឺមានមនុស្សប្រមាណ ១៥០នាក់៕
