បរទេស៖ នេះបើយោងតាមការចេញផ្សាយរបស់សារព័ត៌មាន RT នៅថ្ងៃទី៣ ខែមីនា ឆ្នាំ២០២២កន្លងមកបានអោយដឹងថាលោកប្រធានាធិបតីអ៊ុយក្រែន Volodymyr Zelensky បានបង្ហាញអំពីការត្រៀមខ្លួនរួចរាល់ក្នុងការជួបពិភាក្សាដោយផ្ទាល់ជាមួយលោកប្រធានាធិបតីរុស្សី Vladimir Putin។ ហើយក៏បានស្នើរអោយភាគីទាំង ២ ជួបពិភាក្សាគ្នាដោះស្រាយនៅបញ្ហាជម្លោះ ក្នុងនាមជាអ្នកជិតខាងនឹងគ្នា។
លោក Zelensky បានថ្លែងប្រាប់អ្នកសារព័ត៌មានថា “តើអ្នកចង់បានអ្វីពីយើង? ចាកចេញពីទឹកដីរបស់យើង។ អ្នកមិនចង់ចាកចេញឥឡូវនេះទេ អញ្ចឹងមកអង្គុយជាមួយខ្ញុំនៅតុចរចា ខ្ញុំមានតុសម្រាប់ចរចាហើយ។ អង្គុយជាមួយខ្ញុំ ប៉ុន្តែមិនមែនចំងាយ ៣០ ម៉ែត្រដូចកាលអ្នកជួបជាមួយលោក Macron, លោក Scholz និងអ្នកផ្សេងទៀតនោះទេ។ ខ្ញុំជាអ្នកជិតខាង ខ្ញុំមិនចាំបាច់នៅឆ្ងាយដល់ទៅ ៣០ ម៉ែត្រនោះទេ”។
ចំពោះសំនួរដែលបានចោទសួរទាក់ទងនឹងការធានាសន្តិសុខ ដែលខាងរុស្សីបានស្នើរនោះ ស្រាប់តែលោក Zelensky បានបញ្ជាក់ថា “ធានាអ្វី? យើងមិនបានវាយប្រហាររុស្ស៊ី ហើយក៏មិនចង់វាយប្រហារដែរ។ តើយើងនៅក្នុងអង្គការ NATO ទេ? ទេ។ តើយើងមានអាវុធនុយក្លេអ៊ែរទេ? ទេ។ តើខ្ញុំគួរនិយាយអ្វី?”៕
