បរទេស៖ បើទោះបីជាមានការឆ្លងរាលដាលនៃវីរុសបម្លែងថ្មីអូមីក្រុងក៏ដោយ ក៏ប្រទេសថៃបានបញ្ជាក់ថា នឹងមិនដាក់ចេញនូវវិធានការបិទខ្ទប់ឡើយ។
រដ្ឋមន្ត្រីក្រសួងសុខាភិបាលថៃ លោក Anutin Charnvirakul បាននិយាយថា ប្រទេសថៃនឹងមិនដាក់ចេញនូវបទបញ្ជាណាមួយដើម្បីបិទខ្ទប់ប្រទេសនោះឡើយ បើទោះបីជាប្រទេសនេះបានបង្កើនហានិភ័យនៃការឆ្លងជំងឺកូវីដ-១៩ ដល់កម្រិតទី៤ ដែលជាកម្រិតខ្ពស់បំផុតលំដាប់ទីពីរនៅទូទាំងប្រទេសក៏ដោយ។
លោកបានពន្យល់ថា ការធ្វើឱ្យប្រសើរឡើងក្នុងគោលបំណងរំលឹកដល់ប្រជាជនឱ្យរក្សាគម្លាតសុវត្ថិភាព និងជៀសវាងការជួបជុំគ្នាច្រើនដើម្បីការពារការឆ្លងរាលដាលនៃមេរោគរាតត្បាតនេះ។ លោកបានអំពាវនាវឱ្យប្រជាជនរក្សាភាពស្ងប់ស្ងាត់ ខណៈដែលចំនួនអ្នកឆ្លងក៏មានការកំពុងកើនឡើងនៅក្នុងប្រទេសជាច្រើនផងដែរ។
លោកបាននិយាយថា ប្រទេសថៃមានគ្រែសម្រាកព្យាបាលគ្រប់គ្រាន់នៅក្នុងមន្ទីរពេទ្យសម្រាប់អ្នកជំងឺកូវីដ-១៩ ប៉ុន្តែលោកបានណែនាំអ្នកជំងឺដែលមិនមានរោគសញ្ញា ឬមានរោគសញ្ញាស្រាលឱ្យសម្រាកព្យាបាលនៅតាមផ្ទះ ដើម្បីជៀសវាងភាពលើសលប់ទៅលើប្រព័ន្ធថែទាំសុខភាពសាធារណៈ។
កាលពីថ្ងៃទី២២ ខែកុម្ភៈ ប្រទេសថៃបានរាយការណ៍ថា មានករណីឆ្លងថ្មីនៃជំងឺកូវីដ-១៩ ចំនួន ១៨ ៣៦៤នាក់ និងមានអ្នកស្លាប់ចំនួន ៣៥នាក់ ដែលធ្វើឱ្យចំនួនសរុបកើនឡើងដល់ជាង ២,៧៤លាននាក់ និងករណីស្លាប់សរុបចំនួន ២២ ៦៩១នាក់៕
ប្រភព៖ ក្រសួងព័ត៌មាន
