បរទេស៖ យោងតាមរដ្ឋមន្ត្រីក្រសួងហិរញ្ញវត្ថុឥណ្ឌូណេស៊ី លោកស្រី Sri Mulyani Indrawati បាននិយាយថា រដ្ឋាភិបាលឥណ្ឌូណេស៊ីបានចំណាយថវិកាប្រហែល ៤៥,៩ប៊ីលានដុល្លារអាម៉េរិក ឬស្មើនឹង ២៣,៦ភាគរយនៃការចំណាយថវិកាសរុបនៅក្នុងឆ្នាំ២០២១ សម្រាប់ការស្តារសេដ្ឋកិច្ចឡើងវិញ។
លោកស្រីបាននិយាយនៅក្នុងព្រឹត្តិការណ៍មួយដែលប្រទេសឥណ្ឌូណេស៊ីជាប្រធានក្រុមប្រទេស G20 កាលពីថ្ងៃទី១៦ ខែកុម្ភៈថា ការដោះស្រាយបញ្ហាជំងឺកូវីដ-១៩ ដែលទឹកប្រាក់ដ៏ច្រើនត្រូវបានចំណាយនោះ ទីបំផុតបានទទួលជោគជ័យក្នុងការជំរុញកំណើនសេដ្ឋកិច្ចរបស់ប្រទេសឥណ្ឌូណេស៊ីកាលពីក្នុងឆ្នាំ២០២១។
លោកស្រីរដ្ឋមន្ត្រីរូបនេះបាននិយាយថា សេដ្ឋកិច្ចរបស់ប្រទេសឥណ្ឌូណេស៊ីបានកើនឡើង ៣,៦៥ភាគរយនៅក្នុងឆ្នាំ២០២១។ ការស្ទុះងើបឡើងវិញ បាននិងកំពុងកើតឡើងនៅក្នុងគ្រប់ទិដ្ឋភាពនៃសេដ្ឋកិច្ចទាំងផ្នែកផលិតកម្ម ការផ្គត់ផ្គង់ និងតម្រូវការ ក៏ដូចជាការនាំចេញដែលត្រូវបានជំរុញយ៉ាងខ្លាំងដោយការស្ទុះងើបឡើងវិញរបស់ពិភពលោក។
កំណើនខ្លាំងក៏បានកើតឡើងផងដែរនៅក្នុងវិស័យសំខាន់ៗមួយចំនួន ដូចជាវិស័យផលិតកម្ម ពាណិជ្ជកម្ម និងការរុករករ៉ែ ដោយសារការកើនឡើងនៃតម្លៃទំនិញ។ ទិន្នផលសេដ្ឋកិច្ចរបស់ឥណ្ឌូណេស៊ីក៏បានលើសពីកម្រិតមុនមានជំងឺរាតត្បាតផងដែរ។
លោកស្រីរដ្ឋមន្ត្រីបានសង្កត់ធ្ងន់ថា ការវិវឌ្ឍន៍ជាវិជ្ជមានទាំងនេះបានធ្វើឱ្យប្រទេសឥណ្ឌូណេស៊ីក្លាយជាប្រទេសកំពុងអភិវឌ្ឍន៍មួយដែលមានការស្តារឡើងវិញយ៉ាងឆាប់រហ័ស និងខ្ពស់ជាងកាលពីវិបត្តិហិរញ្ញវត្ថុក្រោយឆ្នាំ១៩៩៧-១៩៩៨ ទៀតផង។ លោកស្រីបាននិយាយថា ទោះជាយ៉ាងណាក៏ដោយ ក៏រដ្ឋាភិបាលនឹងបន្តអនុវត្តគោលនយោបាយប្រកបដោយប្រសិទ្ធភាព ដោយសារដំណើរការស្តារឡើងវិញនៅតែដំណើរការ ហើយនឹងបន្តត្រូវការជំនួយផ្នែកសារពើពន្ធ៕
ប្រភព៖ ក្រសួងព័ត៌មាន
