Cristiano Ronaldo ត្រូវបានគេរាយការណ៍ថាចង់ត្រឡប់ទៅកាន់ក្លិបចាស់អធិរាជស Real Madrid វិញក្នុងអំឡុងទីផ្សារដោះដូរកីឡាកររដូវក្តៅនេះ។
កំពូលខ្សែប្រយុទ្ធព័រទុយហ្គាល់រូបនេះ បានចូលរួមជាមួយ Manchester United ម្តងទៀតពេលផ្ទេរពី Juventus កាលពីឆ្នាំមុន ហើយបានស្ថិតក្នុងទម្រង់លេងដ៏គួរអោយចាប់អារម្មណ៍សម្រាប់ក្រុមបិសាចក្រហមក្នុងរដូវកាលនេះ ដោយស៊ុតបាន ១៤គ្រាប់ ក្នុងការបង្ហាញខ្លួន ២៣ប្រកួតសម្រាប់ក្រុម។
Ronaldo ត្រូវបានគេរំពឹងថាអាចនឹងចាកចេញពី Old Trafford ប្រសិនបើម្ចាស់ជើងឯកអង់គ្លេស ២០សម័យមួយនេះ បរាជ័យក្នុងការប្រកួត Champions League នៅរដូវកាលក្រោយ។
យោងតាមសារព័ត៌មាន El Nacional បានឲ្យដឹងថាកីឡាករវ័យ ៣៦ ឆ្នាំរូបនេះ បានប្រាប់ភ្នាក់ងាររបស់គេគឺលោក Jorge Mendes ឲ្យស្វែងរកក្លិបថ្មីមុនយុទ្ធនាការ ២០២២-២៣ ។ របាយការណ៍បានអះអាងថា Ronaldo រីករាយក្នុងការត្រលប់ទៅកាន់ Real Madrid វិញ ដោយរូបគេ អស់សង្ឃឹមក្នុងការឈ្នះពានរង្វាន់បន្ថែមទៀត មុនពេលបញ្ចប់អាជីពរបស់គេ ខណៈដែល Paris Saint-Germain ក៏ត្រូវបានគេនិយាយថា កំពុងតាមដានយ៉ាងដិតដល់ចំពោះស្ថានភាពកីឡាកររូបនេះ ។
ទោះជាយ៉ាងណា Ronaldo មានកុងត្រានៅ Old Trafford រហូតដល់ខែមិថុនា ឆ្នាំ ២០២៣ ប៉ុន្តែលោក Jorge Mendes បានធ្វើការទាក់ទងទៅកាន់ប្រធានក្លិប R.Madrid លោក Florentino Perez ដើម្បីស្នើសុំការផ្ទេរត្រលប់ទៅកាន់កីឡដ្ឋាន Santiago Bernabeu វិញរួចហើយ៕
