បរទេស៖ អាជ្ញាធរម៉ាឡេស៊ីបានទទួលយកសំណើរបស់ប្រទេសថៃក្នុងការបើកឡើងវិញនូវច្រកព្រំដែន Tak Bai និង Buke Ta របស់ខេត្តណារ៉ាធីវ៉ាត់ដែលត្រូវបានបិទ ដើម្បីទប់ស្កាត់ការឆ្លងរាលដាលនៃមេរោគកូវីដ-១៩។
រដ្ឋមន្ត្រីក្រសួងពាណិជ្ជកម្មថៃ លោក Jurin Laksanawisit បានរំពឹងថា ការបើកច្រកព្រំដែនទាំងពីរនោះឡើងវិញនៅក្នុងខេត្តណារ៉ាធីវ៉ាត់នៅភាគខាងត្បូងរបស់ប្រទេសថៃកាលពីថ្ងៃទី១៥ ខែវិច្ឆិកា នឹងធ្វើឱ្យពាណិជ្ជកម្មរបស់ប្រទេសនេះកើនឡើងយ៉ាងហោចណាស់ ៦០០លានបាត (១៨,៣២លានដុល្លារអាម៉េរិក) ក្នុងមួយឆ្នាំ។
សារព័ត៌មានថៃ The Nation បានរាយការណ៍ថា លោករដ្ឋមន្ត្រីរូបនេះបាននិយាយបន្ថែមថា ប្រទេសថៃមានច្រកព្រំដែនចំនួន ៩៧ ជាមួយនឹងប្រទេសជិតខាង ហើយនៅក្នុងនោះ ច្រកព្រំដែនចំនួន ៤៦ បានដំណើរការឡើងវិញ ដោយសារស្ថានភាពជំងឺកូវីដ-១៩ មានភាពប្រសើរឡើង។
លោករដ្ឋមន្ត្រីរូបនេះត្រូវបានដកស្រង់សម្តីដោយសារព័ត៌មាននេះថា «ក្នុងរយៈពេលប្រាំបួនខែដំបូងនៃឆ្នាំនេះ ពាណិជ្ជកម្មឆ្លងព្រំដែនមានតម្លៃ ១,២៧ទ្រីលានបាត ដែលបានកើនឡើង ៣១,៦៧ភាគរយបើធៀបទៅនឹងរយៈពេលដូចគ្នាកាលពីក្នុងឆ្នាំ២០២០។ ការនាំចេញបានរួមចំណែក ៧៧៨,៣៦ប៊ីលានបាត ដែលកើនឡើងបាន ៣៨,០៦ភាគរយ ខណៈដែលការនាំចូលមានតម្លៃ ៤៩៧,១៧ប៊ីលានបាត ដែលកើនឡើងបាន ២២,៧៨ភាគរយ»។
ក្រសួងពាណិជ្ជកម្មបាននិយាយថា ប្រទេសម៉ាឡេស៊ី គឺជាដៃគូពាណិជ្ជកម្មឆ្លងដែនលំដាប់ទី១ របស់ប្រទេសថៃ ជាមួយនឹងទំហំពាណិជ្ជកម្មសរុបក្នុងរយៈពេល ៩ខែដំបូងនៃឆ្នាំ២០២១ ដែលត្រូវបានកត់ត្រាចំនួន ២៣៩ប៊ីលានបាត ដែលកើនឡើងបាន ៣៦,៤៧ភាគរយ៕
ប្រភព៖ ក្រសួងព័ត៌មាន
