យន្តហោះ A321 មួយគ្រឿង បានទៅប៉ះទង្គិចនឹងយន្តហោះ ដែលនៅស្ងៀមមួយគ្រឿង មុនពេលហោះឡើង នៅអាកាសយានដ្ឋានអន្តរជាតិ Noi Bai ទីក្រុងហាណូយ ប្រទេសវៀតណាម កាលពីថ្ងៃអង្គារ។
យោងតាមសារព័ត៌មាន VN Express ចេញផ្សាយនៅថ្ងៃទី២ ខែវិច្ឆិកា ឆ្នាំ២០២១ បានឱ្យដឹងថា ជើងហោះហើរ QH1621 របស់ក្រុមហ៊ុនអាកាសចរណ៍ Bamboo Airways ពីទីក្រុងហាណូយ ទៅកោះ Phu Quoc គ្រោងនឹងចេញដំណើរនៅម៉ោង 7 ព្រឹក នៅថ្ងៃអង្គារ ប៉ុន្តែនៅពេលធ្វើដំណើរទៅកាន់ផ្លូវរត់ កន្ទុយរបស់យន្តហោះនេះ បានបុកកាប៊ីនយន្តហោះ A321 មួយគ្រឿងទៀតដែលចតនៅក្បែរនោះ។
យន្តហោះទាំងពីរគ្រឿងបានរងការខូចខាតបន្តិចបន្តួច ដោយអ្នកដំណើរដែលធ្វើដំណើរទៅកាន់ Phu Quoc បានផ្ទេរទៅកាន់ជើងហោះហើរមួយផ្សេងទៀត ដោយពន្យារពេលការចាកចេញប្រហែលពីរម៉ោង។
លោក Dinh Viet Thang ប្រធានអាជ្ញាធរ អាកាសចរណ៍ស៊ីវិល វៀតណាម (CAAV) បាននិយាយថា អ្នកបើកយន្តហោះ ដែលមានកំហុសត្រូវបានផ្អាក ដោយសារការធ្វេសប្រហែស រង់ចាំការស៊ើបអង្កេតជាផ្លូវការ៕
