មកដល់ពេលនេះយើងបានដឹងហើយថាលីគកំពូលអង់គ្លេស Premier League នឹងត្រឡប់មកវិញតាមផែនការនៅថ្ងៃទី១៧ ខែមិថុនា ទាំងដែលការប្រកួតនឹងធ្វើឡើងដោយបិទទ្វារមិនមានទស្សនិកជនទស្សនាការប្រកួតដោយផ្ទាល់ឡើយដោយសារកូវីដ១៩។
ប៉ុន្តែយោងតាមការទស្សទាយរបស់ក្លឹបនីមួយៗជឿជាក់ថានឹងមានឱកាសដែលអនុញ្ញាតិឲ្យអ្នកគាំទ្រក្លឹបរបស់ខ្លួនទាំងអស់ក្នុងការវិលត្រឡប់មកចូលរួមទស្សនាការប្រកួតរបស់ពួកគេឡើងវិញពោលគឺចាប់ពីខែកញ្ញាជារដូវកាលថ្មីក្រោយនេះ។
ក្លឹបកំពូលទាំង២០សង្ឃឹមយ៉ាងមុតម៉ាំថាដំណាក់កាលដកបម្រាមនីមួយៗនឹងប្រព្រឹត្តិទៅយ៉ាងរលូនហើយនោះអ្នកគាំទ្រក្លឹបនឹងអាចត្រឡប់មកវិញឲ្យទាន់រដូវកាល២០២០-២០២១ដែលនឹងចាប់ផ្តើមពីថ្ងៃទី១២និង១៣ខែកញ្ញាខាងមុខនេះ។
បើទោះបីជាមិនទាន់មានការបញ្ជាក់ច្បាស់នៅក្នុងកិច្ចប្រជុំកាលពីថ្ងៃព្រហស្បតិ៍ម្សិលមិញប៉ុន្តែ The Mirror អាចជឿជាក់ថាទស្សនិកជនក្នុងកម្រិតមួយនឹងអាចត្រឡប់មកទស្សនាការប្រកួតវិញបាននៅរដូវកាលក្រោយទោះមិនអាចពេញកីឡាដ្ឋានក្តី៕
ប្រែសម្រួល៖Lee
