ក្លិប Barcelona កំពុងមានទំនុកចិត្តយ៉ាងខ្លាំង ក្នុងការចុះហត្ថលេខាយក កីឡាករ Pierre-Emerick Aubameyang ក្លិបកាំភ្លើងធំ ។ នេះបើតាមការចុះផ្សាយរបស់ Metro នាថ្ងៃទី០១ ខែមីនា ។
ខ្សែប្រយុទ្ធសញ្ជាតិហ្គាបន បានក្លាយជាកីឡាករសំខាន់របស់ កាំភ្លើងធំ ក្រោយពេលចាកចេញពី Dortmund កាលពីឆ្នាំ២០១៨ ក្នុងតម្លៃខ្លួន ៥៦លានផោន។
កីឡាករអាយុ ៣០ឆ្នាំរូបនេះ បានក្លាយជាប្រធានក្រុមរបស់កាំភ្លើងធំ កាលពីខែវិច្ឆិកា ឆ្នាំទៅ ហើយកំពុងមានការចាប់អារម្មណ៍ពីក្លិបអេស្ប៉ាញ ដើម្បីល្បួងយកចេញ ។
ក្នុងនោះដែរ Daily Express បានចុះផ្សាយថា ក្រុមយក្សអេស្ប៉ាញ Barcelona អាចនឹងនាំយកកីឡាករ ខ្សែប្រយុទ្ធនេះបាន ខណៈដែលក្លិបកាំភ្លើងធំ កំពុងខ្វះខាតក្នុងការលេង នៅពាន UCL ។
កាំភ្លើងធំ បច្ចុប្បន្នស្ថិតនៅលេខរៀងទី១០ នៅលីកកំពូលអង់គ្លេស ដែលចាញ់ចំនួន ៨ពិន្ទុ ពីតោខោខៀវ ដែលឈរនៅលេខរៀងទី ៤ ហើយទើបតែធ្លាក់ចេញពីពាន យូរ៉ូប៉ាលីក ក្រោមថ្វីជើង Olympiakos ផងដែរ។
ក្រៅពីក្លិបយក្សអេស្ប៉ាញ ក៏មានក្លិបយក្សនៅអ៊ីតាលី Inter Milan ចាប់អារម្មណ៍ទៅលើ កីឡាករ Pierre-Emerick Aubameyang ដូចគ្នា ។
គួរបញ្ជាក់ថា ក្លិបកាំភ្លើងធំ មិនចង់ចុះហត្ថលេខាជាថ្មីជាមួយខ្សែប្រយុទ្ធខាងលើនោះទេ តែ Mikel Arteta បានទទួចថា នឹងព្យាយាមបញ្ចុះបញ្ចូលកីឡាករខ្សែប្រយុទ្ធ ខាងលើ លេងជាមួយ ក្លិប ។ កាលពីសប្តាហ៍មុនលោក Mikel Arteta បាននិយាយថា “គាត់គឺជាកីឡាករសំខាន់បំផុតរបស់យើង” ៕
