ភ្នំពេញ៖ ក្រុមបាល់ទាត់ វិសាខា នឹងត្រូវទទួលស្វាគមន៍ភ្ញៀវ សូវទីឡូអង្គរ ក្នុងការប្រកួតលីគកំពូលកម្ពុជា សប្តាហ៍ទី៣ នាថ្ងៃទី០១ ខែមិនា ឆ្នាំ២០២០ នៅវេលាម៉ោង ៦ ល្ងាច លើវាលស្មៅធម្មជាតិកីឡដ្ឋានព្រីនស៍ តើម្ចាស់ផ្ទះអាចបន្តឈ្នះក្នុងដីបានទេល្ងាចនេះ?។
កីឡាករគួឲ្យចាប់អារម្មណ៍ក៏ដូចជាគិតថាគ្រោះថ្នាក់នៅក្នុងការប្រកួតនេះរបស់ក្លិប វិសាខា គឺខ្សែបម្រើ ច្រឹង ពលរដ្ឋ ដែលរកបាន ១គ្រាប់ ក្នុងជ័យជម្នះ ២ទល់១ កាលពីប្រកួតជាមួយ អគ្គស្នងការដ្ឋាននគរបាលជាតិ ដោយការទាត់បាល់ពីចំងាយ ខណៈដែលកីឡាករគ្រោះថ្នាក់របស់ សូទីឡូអង្គរ គឺខ្សែប្រយុទ្ធកំពស់ខ្ពស់ Matheus Souza E Silva ដែលជាកីឡាករតែម្នាក់គត់ដែលរកបានគ្រាប់បាល់ជូនក្លិបនារដូវកាលថ្មីនេះ គឺស៊ុតបញ្ចូលទីក្រុម ព្រះខ័នរាជស្វាយរៀង កាលពីជំនួបសប្តាហ៍ទី១។
គួរបញ្ជាក់ផងដែរថា គិតត្រឹមសប្តាហ៍ទី៣នេះ ក្រុមម្ចាស់ផ្ទះ កំពុងស្ថិតនៅលេខ៧ ដោយឆ្លងកាត់ការប្រកួត ២លើក ឈ្នះម្តង នឹងចាញ់ម្តង ស្របពេលដែល សូលទីឡូអង្គរ កំពុងដុនដាបខ្លាំងនៅបាតតារាង ដោយឆ្លងកាត់ ២ប្រកួតដូចគ្នា ចាញ់ទាំងអស់ ហើយទើបរកបាន ១គ្រាប់ប៉ុណ្ណោះ៕
