ភ្នំពេញ៖ សំបូរ សុភណ្ឌ ដណ្ដើមបានមេដាយមាសជើងឯកពិភពលោក ពីការប្រកួតកីឡាវប្បកម្មជ្រើសរើសជើងឯកពិភពលោកលើកទី១០ ឆ្នាំ ២០១៨ នៅប្រទេសថៃ ប៉ុន្តែក្រោយការទទួលបានជ័យជម្នះកីឡាករនេះ ទទួលបានតែ ២០លាន ដោយជ្រុះ ១០០លាននៅតាមផ្លូវ ទាំងគ្មានហេតុផល ។
កីឡាករ សំបូរ សុភណ្ឌ បានសរសេរនៅលើបណ្តាញទំនាក់ទំនងសង្គមរបស់លោកថា «ខ្ញុំបាទសូមជំរាបសួរនិងគោរពសម្តេចជាទីគោរពដ៏ខ្ពង់ខ្ពស់បំផុតខ្ញុំបាទជាកីឡាករកាយវប្បកម្មកម្ពុជាដែលទើបនិងប្រកួតបានមេដាយមាសលំដាប់ថ្នាក់ពិភពលោកកាលពីថ្ងៃទី15.ខែធ្នូ 2018នៅប្រទេសថៃដែលប្រទេសចូលរួមប្រមាណ51ប្រទេសថ្ងៃនេះខ្ញុំបាទមានបញ្ហាដែលទាក់ទងជាមួយនិងប្រាក់រង្វាន់លើកទឹកចិត្តដោយក្រសួងអបរំបានទំលាក់ប្រាក់រង្វាន់លើកទឹកចិត្តពី120.000.000រៀល ដោយនៅត្រឹមតែ20.000.000រៀល ។
កីឡាករជើងឯករូបនេះបានបន្តដោយសង្កត់ធ្ងន់ថា ប្រាក់ដែលជ្រុះបាត់នោះ ដោយមិនបានបញ្ជាក់ពីមូលហេតុនិងមិនបានប្រាប់អ្នកកីឡារមុនថ្ងៃប្រកួតនោះទេ លុះដល់ពេលដែលខ្ញុំបាទប្រកួតរួចទទួលបានមេដាយហើយទើបក្រសួងបានប្រកាសថាទំលាក់ប្រាក់រង្វាន់លើកទឹកចិត្តទៅវិញ ខ្ញុំសូមអោយសម្តេចជួយដោះស្រាយបញ្ហានេះអោយខ្ញុំបាទផង
ពីព្រោះខ្ញុំមិនដឹងថាត្រូវដោះស្រាយបញ្ហានេះដោយវិធីណាទេសូមអោយសម្តេចជួយដោះស្រាយបញ្ហានេះអោយខ្ញុំបាទដោយក្តីអនុគ្រោះ??ខ្ញុំបាទសូមអរគុណសម្តេចនិងជូនពរអោយសម្តេចមានសុខភាពល្អ ៕
