Memphis Depay បានលើកឡើងដោយការជឿជាក់ថា ក្រុមអ្នកគាំទ្រក្លិប បិសាចក្រហមមើលមិនឃើញពីចំណែកនៃភាពល្អ របស់គាត់ អំឡុងពេលលេងឲ្យក្លិបរយៈពេល ១៩ខែកន្លងមកនោះទេ។
ខ្សែប្រយុទ្ធរបស់ហុល្លង់អាយុ ២៤ឆ្នាំ បានរកគ្រាប់បាល់ចំនួន ៧ គ្រាប់ ក្រោយបង្ហាញខ្លួនលេងជាមួយបិសាចក្រហម កាលពីខែមិថុនា ឆ្នាំ២០១៥ បន្ទាប់ពីផ្លាស់ពីក្លិប PSV ក្នុងតម្លៃខ្លួន ៣១លានផោន។
កាលពីខែមករា ឆ្នាំ២០១៧ កីឡាករខាងលើ បានចាកចេញពីបិសាចក្រហម ទៅចូលរួមអាជីពជាមួយ Lyon នឹងជួយឲ្យក្លិបយកឈ្នះ Man City នៃពាន Champions League កាលពីរាត្រីរំលងអធ្រាត្រ ឈានចូលថ្ងៃទី២០ ខែកញ្ញា ។
កីឡាករសញ្ជាតិដើមហុល្លង់រូបនេះ បាននិយាយថា អ្នកគ្រប់គ្នាដឹងរឿងរ៉ាវរបស់ខ្ញុំ នៅ Manchester United ដែលលេងមិនជោគជ័យ ហើយគ្រប់គ្នាអាចដឹងពីអារម្មណ៍របស់ខ្ញុំ សម្រាប់ខ្ញុំផ្ទាល់មិនចង់សំឡឹងទៅខាងក្រោយនោះទេ ហើយក៏មិនចង់ឃើញ អ្វីទាំងអស់នោះដែរ ។ កីឡាកររូបនេះបានបន្តថា បន្ទាប់ពីមួយរដូវកាល ខ្ញុំមិនដឹងថាខ្ញុំជានរណានៅក្នុងក្រុម ! ខ្ញុំដូចកូនក្មេង ដោយមិនទទួលបានឱកាសច្រើន ។
ចាប់តាំងពីការផ្លាស់ទៅកាន់ទឹកដី Lyon មក កីឡាករMemphis Depay បានបង្ហាញខ្លួនលេងចំនួន ៧៤ប្រកួត ដោយរកគ្រាប់បាល់បាន ២៨ គ្រាប់ និងជួយឲ្យក្លិបបញ្ចប់ត្រឹមលេខរៀងទី៣ នៃតារាង Ligue 1 ៕
