ក្លឹបនៅអ៊ីតាលីចង់បានខ្សែប្រយុទ្ធរបស់បិសាចក្រហម

យោងតាមការចេញផ្សាយរបស់ La Gazzetta dello Sport បានអោយដឹងថាក្លឹប Inter មានបំណងចង់ពង្រឹងក្រុមរបស់ពួកគេ ហើយគ្រោងនឹងនាយកកីឡាករសំខាន់ៗចំនួន ៣រូបនៅរដូវក្តៅនេះ។ ប្រធានក្លឹប Inter លោក Beppe Marotta និងប្រធានផ្នែកកីឡា Piero Ausilio បានកំណត់អត្តសញ្ញាណកីឡាករមួយចំនួន ហើយក្នុងនោះកីឡាករ Hojlund ក៏ស្ថិតក្នុងចំណោមការរំពឹងទុកដែលអ្នកទាំងពីរចង់នាំយកទៅកាន់ប្រទេសអ៊ីតាលី។ ក្លឹប Inter បាន​ស្នើ​សុំ​កិច្ច​សន្យា​ខ្ចី​ជើង​ដំបូង​ទៅ Man Utd ជាមួយ​នឹង​ជម្រើស​ក្នុង​ការ​ទិញ​យក​ខ្សែ​ប្រយុទ្ធ​រូបនេះ។

ការចាកចេញរបស់លោក Simone Inzaghi បានធ្វើឲ្យក្លឹប Inter Milan សម្រេចចិត្តចុះហត្ថលេខានាំយកគ្រូបង្វឹកក្លឹប Parma លោក Cristian Chivu មកជំនួសតំណែងរបស់គាត់។ ទន្ទឹមនឹងនោះ ក្លឹប Inter Milan មានផែនការសំខាន់ៗនៅរដូវក្តៅនេះសម្រាប់តំបន់ចំនួនបី ដោយកំណត់គោលដៅទៅលើកីឡាករ Nico Paz ពី Como, Hojlund ពី United និង Giovanni Leoni មកពី Parma ។ របាយការណ៍បាននិយាយថាលោក Ausilio បានពិភាក្សាជាមួយភ្នាក់ងាររបស់កីឡាករ Hojlund អស់រយៈពេលជាច្រើនសប្តាហ៍ ហើយខ្សែប្រយុទ្ធបានយល់ព្រមលើការផ្លាស់ប្តូរនេះហើយ៕