យោងតាមការចេញផ្សាយរបស់លោក Ben Jacobs ដែលជាអ្នកសារព័ត៌មានកីឡាមួយរូបបានអោយដឹងថាក្លឹប Aston Villa ត្រូវបានរាយការណ៍ថាកំពុងចាប់អារម្មណ៍លើកីឡាករ Joao Felix ខណៈក្លឹប Chelsea សម្លឹងរកមើលការលក់កីឡាករដែលកំពុងលេងខ្ចីជើងនៅក្លឹប AC Milan បន្ទាប់ពីរដូវកាលនេះ។
ក្រោយពីចូលរួមជាមួយ Milan ក្នុងលក្ខខណ្ឌខ្ចីជើងកាលពីខែមករា កីឡាករ Felix បានបង្ហាញការសន្យាដំបូងជាមួយនឹងការបង្ហាញខ្លួនដ៏ខ្លាំងនៅ Coppa Italia ។ ទោះបីជាយ៉ាងណាក៏ដោយ ចាប់តាំងពីពេលនោះមក ទម្រង់លេងរបស់គាត់បានធ្លាក់ចុះ ដែលនាំឱ្យក្លឹបនៅ Serie A ច្រានចោលកិច្ចព្រមព្រៀងផ្ទេរជាអចិន្ត្រៃយ៍។
ក្លឹប Chelsea ដែលដំបូងបានផ្ទេរគាត់មកក្នុងតម្លៃ ៥២លានអឺរ៉ូ កំពុងសម្លឹងរកមើលការរៀបចំរចនាសម្ព័ន្ធហិរញ្ញវត្ថុរបស់ក្លឹបឡើងវិញ ហើយពួកគេអាចនឹងត្រូវលក់ Felix៕
