កីឡាករ Alexander-Arnold មានព័ត៌មានចចាមអារ៉ាមក្នុងការផ្ទេរចេញពីក្លឹប Liverpool ខណៈក្លឹប Real Madrid បានចាប់អារម្មណ៍ក្នុងការចុះហត្ថលេខាលើខ្សែការពារសញ្ជាតិអង់គ្លេស។ ក្រុមហង្សក្រហមចង់រក្សាទុកកីឡាកររូបនេះ និងកំពុងព្យាយាមបញ្ចុះបញ្ចូលគាត់អោយចុះហត្ថលេខាទៅលើកុងត្រាថ្មី ប៉ុន្តែពេលវេលាកាន់តែតិចទៅហើយដោយសារតែកុងត្រាបច្ចុប្បន្នរបស់គាត់នឹងផុតនៅចុងរដូវក្តៅនេះ។
ប្រសិនបើកីឡាករវ័យ ២៦ឆ្នាំមិនចុះកុងត្រាថ្មីត្រឹមខែធ្នូទេ ចាប់ពីដើមឆ្នាំថ្មី គាត់នឹងមានសេរីភាពក្នុងការចរចាទៅលើលក្ខខណ្ឌកុងត្រាជាមួយក្លឹបនៅក្រៅប្រទេស។ ចំពេលមានបញ្ហាលើកុងត្រា អតីតកីឡាករជម្រើសជាតិអង់គ្លេស និងហង្សក្រហមលោក Johnson បានផ្តល់ដំបូន្មានដល់ក្លឹបឱ្យលក់កីឡាករខាងលើ ប្រសិនជាពួកគេទទួលបានសំណើរធំមួយនោះ។
នៅពេលសួរថា តើក្លឹបហង្សក្រហម គួរតែពិចារណាលក់ Alexander-Arnold ដែរឬទេ? លោក Johnson បានប្រាប់ Betfred ថា៖ «បាទ! ពួកគេកំពុងធ្វើការពិភាក្សា ប៉ុន្តែពួកយើងនៅមិនទាន់ដឹងច្បាស់នោះទេ ដូច្នេះអ្នកមិនអាចអនុញ្ញាតឱ្យគាត់ចាកចេញដោយផុតកុងត្រា នៅពេលដែលកីឡាករនៅមានតម្លៃ។ វានឹងក្លាយជាការបាត់បង់ដ៏ធំមួយដោយគ្មានបានអ្វីសោះ។ គ្មាននរណាម្នាក់ចង់ឃើញគាត់ចាកចេញនោះទេ ប៉ុន្តែអ្នកត្រូវតែលក់គាត់ ពីព្រោះពួកគេដឹងថាមានអ្វីកើតឡើងទៅហើយ។ ខ្ញុំមិនដឹងថា តើ Trent ចង់ចាកចេញ ឫក៏ក្លឹបរីករាយក្នុងការអោយគាត់ចាកចេញ ប៉ុន្តែវាពិតជារឿងដ៏ល្ងង់សម្រាប់ក្លឹប Liverpool ដែលខាតបង់ប្រាក់ ប្រសិនជាគាត់នឹងចាកចេញនៅពេលដែលកុងត្រារបស់គាត់ផុត»។
គាត់បានបន្ថែមថា៖ «អ្នកមិនដែលចង់បាត់បង់កីឡាករល្អបំផុតរបស់អ្នកទេ ប៉ុន្តែខ្ញុំមិនដឹងថាវានឹងធ្វើអោយមានអ្វីខុសគ្នានោះទេសម្រាប់ក្លឹប Liverpool ប្រសិនជាគាត់ចាកចេញនៅក្នុងខែមករា ឫក៏ចុងបញ្ចប់នៃរដូវកាលនេះ ប្រសិនជាគាត់មានផែនការក្នុងការចាកចេញពីក្លឹប។ វាអាចនឹងធ្វើអោយមានការប៉ះពាល់ជារួម ពីព្រោះអ្នកមិនដែលចង់ឃើញកីឡាករដែលល្អរបស់អ្នកចាកចេញ ហើយអ្នកមិនចង់អោយគាត់ចាកចេញដោយងាយស្រួល»។
លោក Slot ដែលបច្ចុប្បន្នរីករាយនឹងការនាំមុខមួយពិន្ទុលើក្រុម Manchester City នៅលើកំពូលតារាងនៃក្របខ័ណ្ឌ Premier League នឹងត្រូវប្រកួតជាមួយក្លឹប RB Leipzig នៅ Champions League នាថ្ងៃពុធនេះ៕
