យោងតាមការចេញផ្សាយរបស់ The Athletic បានអោយដឹងថាក្លឹប Barcelona ត្រូវការប្រមូលប្រាក់អោយបាន ១៣០លានអឺរ៉ូ អោយបានមុខចុងខែមិថុនា ឫក៏ពួកគេនឹងត្រូវប្រឈមមុខបញ្ហាឈឺក្បាលនៅពេលដែលធ្វើការចុះឈ្មោះបន្ថែមកីឡាករថ្មី។ ជាលទ្ធផល ក្លឹបកំពុងស្វែងរកការវិនិយោគថ្មី ហើយក៏មានបំណងរៀបចំរចនាសម្ព័ន្ធឡើងវិញជាមួយក្រុមហ៊ុន Nike ផងដែរ។
ដូចដែលបានបញ្ជាក់ ក្លឹប Barcelona មិនអាចចុះឈ្មោះកីឡាករមួយចំនួនជាមួយ La Liga បាន។ កីឡាករ Sergi Roberto និង Marcos Alonso នឹងផុតកុងត្រាក្នុងពេលឆាប់ៗនេះ ខណៈដែលនៅមានសញ្ញាសួរជុំវិញកិច្ចព្រមព្រៀងកុងត្រាជាមួយ Gavi។
វិបត្តិហិរញ្ញវត្ថុរបស់ក្លឹប Barcelona កាន់តែធ្ងន់ធ្ងរទៅៗ ដោយសារតែកីឡាករខ្ចីជើងបានត្រលប់មកកាន់ក្លឹបនឹងទទួលប្រាក់ឈ្នួលពីក្លឹបវិញ។ កីឡាករ Ansu Fati, Eric Garcia, Clement Lenglet និង Sergino Dest ទាំងអស់កំពុងត្រលប់ទៅ Camp Nou ។ វានៅតែត្រូវមើលថាតើកីឡាករទាំងបួននាក់ត្រូវលក់ ឬយ៉ាងណា ខណៈគ្មាននរណាម្នាក់ស្ថិតនៅក្នុងផែនការរបស់លោក Hansi Flick នោះទេ។
ប្រសិនជាក្លឹប Barcelona មិនអាចស្វែងរកនូវវិធីសាស្ត្រក្នុងការប្រមូលថវិកាបាននោះទេ ពួកគេនឹងប្រឈមមុខនឹងឧបសគ្គដ៏សំខាន់នៅពេលនិយាយអំពីការបន្ថែមកីឡាករថ្មី។ ប្រភពដដែលបានបន្ថែមថា ការលក់កីឡាករក្នុងជម្រើស១១នាក់ដំបូង គឺមិនអាចចៀសបាននោះទេ។ កីឡាករ Ronald Araujo, Frenkie De Jong និង Raphinha ទាំងអស់អាចត្រូវបានចាត់ទុកថាជាគោលដៅសម្រាប់ការលក់ចេញ។
ពេលវេលាកំពុងមានកំណត់សម្រាប់ក្លឹប Barcelona។ កិច្ចព្រមព្រៀងត្រូវតែត្រូវបានធ្វើឱ្យបានលឿន ប្រសិនបើពួកគេត្រូវដាក់បញ្ជូលកីឡាករថ្មីមកកាន់ Camp Nou៕
