ក្លឹប Manchester United បានយល់ព្រមលើកិច្ចសន្យាខ្ចីជើងជាមួយក្រុម Eintracht Frankfurt នៃក្របខ័ណ្ឌ Bundesliga សម្រាប់កីឡាករ Donny van de Beek ដែលត្រូវផ្លាស់ទៅប្រទេសអាល្លឺម៉ង់ក្នុងខែមករា នេះបើយោងតាមរបាយការណ៍ពី Metro។
កីឡាករ Van de Beek មិនបានសូម្បីតែការបង្ហាញខ្លួនសម្រាប់ការប្រកួតពាន Carabao Cup។ កីឡាករវ័យ 26 ឆ្នាំរូបនេះ មិនបានអង្គុយកៅអីបម្រុងតាំងពីដើមរដូវកាល ប៉ុន្តែដោយសារវិបត្តិរបួសកីឡាកររបស់ Man Utd បានធ្វើឱ្យគេមានឈ្មោះក្នុងក្រុមសម្រាប់ការប្រកួតចំនួន 8 ក្នុងចំណោម 11 ប្រកួតចុងក្រោយ។
ដោយយោងតាមការចេញផ្សាយរបស់ Fabrizio Romano បានរាយការណ៍ថាកិច្ចព្រមព្រៀងក្នុងលក្ខខណ្ឌខ្ចីជើង Van de Beek បានធ្វើឡើងរួចហើយរវាង Man United និង Frankfurt។
អតីតខ្សែបម្រើ Ajax នឹងផ្លាស់ទៅ Bundesliga ក្នុងលក្ខខ័ណ្ឌខ្ចីជើងរហូតដល់ដំណាច់រដូវកាលនេះ ហើយ Frankfurt អាចប្រែក្លាយកិច្ចព្រមព្រៀងនេះទៅជាការផ្ទេរអចិន្ត្រៃយ៍ក្នុងតម្លៃ 15លានអឺរ៉ូ (£12.8m)។
ប្រសិនបើ Van de Beek ចូលរួមជាមួយ Frankfurt ជាអចិន្ត្រៃយ៍ តួលេខនោះនឹងតំណាងឱ្យការខាតបង់ដ៏ធំសម្រាប់កីឡាករដែលមានតម្លៃខ្លូនចំនួន 34.7 លានផោន នៅពេលដែលគាត់បានផ្លាស់ប្តូរពី Amsterdam ទៅ Manchester ក្នុងរដូវក្តៅឆ្នាំ 2020។
Ten Hag បាននិយាយពីអនាគត Van de Beek ថា៖ «គាត់ស្ថិតក្នុងក្រុម ដូច្នេះគាត់នៅតែមានឱកាស ដោយសារតែគាត់មិនទាន់ជាសះស្បើយពីរបួស ១០០ %។ ប៉ុន្តែឥឡូវនេះគាត់ត្រលប់មកវិញហើយ និងកំពុងហ្វឹកហាត់បានល្អ»៕
