កីឡាករ Cristiano Ronaldo បានអបអរជាមួយការបង្ហាញខ្លួននៅលើទីលានចំនួន 1,200 ប្រកួតក្នុងអាជីពរបស់គាត់ ។
Ronaldo បានថ្លែងអំណរគុណដល់អ្នកទាំងអស់គ្នាដែលបានជួយគាត់ឱ្យឈានដល់ចំណុចដ៏អស្ចារ្យ ហើយគាត់បានបន្ថែមថាគាត់មិនបញ្ចប់ត្រឹមនេះទេ។ ខ្សែប្រយុទ្ធសញ្ជាតិព័រទុយហ្គាល់ គឺជាអ្នកស៊ុតបញ្ចូលទីច្រើនជាងគេរបស់ Saudi Pro League ជាមួយនឹង 16 គ្រាប់ក្នុង15 ប្រកួតនៅរដូវកាលនេះ។
ដោយអតីតអ្នកចាំទីជម្រើសជាតិអង់គ្លេស Peter Shilton ត្រូវបានគេទទួលស្គាល់ថាជាម្ចាស់កំណត់ត្រា សម្រាប់ការបង្ហាញខ្លួនច្រើនក្នុងអាជីព ដែលមានការប្រកួតប្រជែងចំនួន 1,387 ប្រកួតមុននចូលនិវត្តន៍ ។
Saudi Pro League បានបញ្ជាក់នៅលើប្រព័ន្ធផ្សព្វផ្សាយសង្គមថា Ronaldo បានឈានដល់ចំណុចដ៏អស្ចារ្យ ហើយក្រោយមក Ronaldo បានបង្ហោះនៅលើ Instagram ថា «បីពិន្ទុទៀតហើយ! រគុណមិត្តរួមក្រុមទាំងអស់ដែលបានជួយខ្ញុំ ឱ្យឈានដល់ការប្រកួតលើកទី 1,200 ក្នុងអាជីពរបស់ខ្ញុំ ។ ប៉ុន្តែពួកយើងមិនបញ្ចប់ត្រឹមនេះទេ»។
Ronaldo ក៏បានកត់ត្រាការបង្ហាញខ្លួនជាលើកទី 1,000 របស់គាត់នៅក្នុងខែកុម្ភៈ 2020 ដោយស៊ុតបញ្ចូលទីឱ្យ Juventus ក្នុងក្របខ័ណ្ឌ Serie A។ ក្នុងខែមិថុនា គាត់បានក្លាយជាកីឡាករបុរសដំបូងគេ ដែលបានបង្ហាញខ្លួនជាមួយក្រុមជម្រើសជាតិចំនួន 200 ប្រកួតពេលគាត់បង្ហាញខ្លួនឱ្យព័រទុយហ្គាល់ទល់នឹងអ៊ីស្លង់ ហើយគាត់ក៏ជាកីឡាករស៊ុតបញ្ចូលទីច្រើនជាងគេជាមួយក្រុមជម្រើសជាតិ ដោយស៊ុតបញ្ចូលទីបាន 128 គ្រាប់។
គួរបញ្ជាក់ផងដែរ គាត់បានបង្ហាញខ្លួនជាមួយ Sporting ចំនួន 31 ប្រកួត ,ជាមួយ Manchester United ចំនួន 346 ប្រកួត ,ជាមួយ Real Madrid ចំនួន 438 ប្រកួត ,ជាមួយ Juventus ចំនួន 134 ប្រកួត ,ជាមួយ Al Nassr ចំនួន 46 ប្រកួត និងជាមួយក្រុមជម្រើសជាតិ Portugal ចំនួន 205 ប្រកួត៕
