កីឡាករ Luis Suarez បានសសើរកីឡាករ Darwin Nunez របស់ Liverpool ថាជាខ្សែប្រយុទ្ធដ៏ល្អម្នាក់ក្នុងពិភពលោក បន្ទាប់ពីក្រុម Uruguay បានយកឈ្នះក្រុម Bolivia ៣-០ កាលពីថ្ងៃអង្គារ។
កីឡាករ Nunez បានស៊ុតបាល់បញ្ចូលទីពីរគ្រាប់ក្នុងជ័យជម្នះដែលជួយអោយឱ្យក្រុម Uruguay ស្ថិតនៅចំណាត់ថ្នាក់លេខ 2 ក្នុងការប្រកួតជម្រុះ World Cup ។
Nunez ក៏រកបានគ្រាប់បាល់ផងដែរក្នុងជ័យជម្នះ 2-0 របស់អ៊ុយរូហ្គាយទល់នឹងអាហ្សង់ទីនកាលពីថ្ងៃសុក្រមុន ខណៈដែល Suarez ជាកីឡាករដែលប្ដូរចូលជំនួសខ្សែប្រយុទ្ធ Liverpool នៅតង់ទីពីរសម្រាប់ការប្រកួតទាំងពីរនោះ។
Suarez បាននិយាយថា គាត់សប្បាយចិត្តខ្លាំងណាស់ជាមួយនឹងតួនាទីរបស់គាត់ ដែលត្រូវបានកាត់បន្ថយ សម្រាប់ក្រុមជម្រើសជាតិ Uruguay ហើយបានសរសើរកីឡាករ Nunez ដែលជាកីឡាករជំនួសតួនាទីរបស់គាត់នៅជម្រើស ១១ នាក់ដំបូង ។
Suarez បាន និយាយ ថា៖ «ខ្ញុំមានអារម្មណ៍សប្បាយចិត្តខ្លាំងណាស់ ទោះបីជាវត្តមាននៅលើទីលានត្រូវកាត់បន្ថយ។ ខ្ញុំធ្លាប់ជាខ្សែប្រយុទ្ធកណ្ដាលដ៏ល្អម្នាក់សម្រាប់ក្រុម Uruguay ប៉ុន្តែពេលនេះក្រុមរបស់យើងមានកីឡាករដែលជំនួសតួនាទីរបស់ខ្ញុំហើយគឺ Darwin»។
«ក្រុមត្រូវការគាត់ ហើយគាត់គឺជាម៉ាស៊ីនរកគ្រាប់បាល់ក្នុងក្រុមរបស់យើង សម្រាប់ខ្ញុំរឿងតែមួយគត់ដែលខ្ញុំត្រូវធ្វើ គឺរួមចំណែកជាមួយក្រុម និងអបអរសាទរគាត់ចំពោះសមត្ថភាពដែលគាត់កំពុងបង្ហាញ»។
នៅពេល Nunez ឮការកោតសរសើរពី Suarez ថាគាត់គឺជាខ្សែប្រយុទ្ធដ៏ល្អម្នាក់ Nunez បាននិយាយថា៖ «ពាក្យសរសើររបស់គាត់ ធ្វើឱ្យខ្ញុំសប្បាយចិត្តខ្លាំងណាស់។ ខ្សែប្រយុទ្ធល្អបំផុតសម្រាប់ខ្ញុំគឺគាត់ គាត់គឺជាកីឡាករលេខ 9 ដ៏ល្អបំផុតនៅក្នុងប្រវត្តិសាស្ត្ររបស់ក្រុមជម្រើសជាតិ Uruguay ហើយយើងទាំងអស់គ្នារីករាយជាមួយគាត់»៕
