ក្លឹប Real Madrid បានចេញសេចក្ដីថ្លែងការណ៍មួយដែលមិនអនុញ្ញាតឱ្យខ្សែបម្រើកណ្ដាល Aurelien Tchouameni ចាកចេញពីក្លឹប ហើយចាត់ទុកគាត់ជាកីឡាករសំខាន់សម្រាប់រយៈពេលយូរ។
កីឡាករវ័យ 23 ឆ្នាំរូបនេះត្រូវបានផ្សារភ្ជាប់ជាមួយនឹងការផ្លាស់ទៅ Arsenal ក្នុងប៉ុន្មានសប្តាហ៍ថ្មីៗនេះ ដោយ Mikel Arteta កំពុងសម្លឹងរកមើលការបង្កើនជម្រើសខ្សែបម្រើកណ្តាលរបស់គាត់នៅឆ្នាំ 2024 ហើយ Liverpool នៅតែជាអ្នកកោតសរសើរពីសមត្ថភាពរបស់កីឡាករ Tchouameni បន្ទាប់ពីបាត់បង់ការចុះហត្ថលេខាកាលពីឆ្នាំមុន។
យោងតាមកាសែត 90min បានបង្ហាញនៅក្នុងរដូវក្តៅថា Liverpool បានសួរទៅកាន់ Madrid ម្តងទៀតអំពីការចុះហត្ថលេខាលើកីឡាករ Tchouameni ប៉ុន្តែត្រូវបានពួកគេប្រាប់ថា កីឡាករសញ្ជាតិបារាំងរូបនេះ មិនលក់ជាដាច់ខាត ទោះបីក្នុងកាលៈទេសៈណាក៏ដោយ។ ចំណែក Arsenal ក៏បានទាក់ទងជាមួយ Madrid ប៉ុន្តែក៏ទទួលបានការឆ្លើយតបដូចគ្នា។
ប្រភពបានបញ្ជាក់មកកាន់ 90min ថាជំហរដ៏រឹងមាំរបស់ Madrid លើ Tchouameni គឺដោយសារតែពួកគេចាត់ទុកគាត់ជាផ្នែកដ៏សំខាន់នៃខ្សែបម្រើរបស់ពួកគេ ហើយទាំងក្លឹប និងកីឡាករពិតជារីករាយជាមួយនឹងរបៀបដែលគាត់កំពុងរីកចម្រើន។
វាត្រូវបានគេប៉ាន់ស្មានថាការមកដល់របស់ Jude Bellingham អាចប៉ះពាល់ដល់ Tchouameni និងមិត្តរួមក្រុម Eduardo Camavinga ប៉ុន្តែលោក Carlo Ancelotti បានទទូចថាវាមិនដូច្នោះទេ។
ហើយការធានារបស់លោក Ancelotti បានកើតឡើងរហូតមកដល់ពេលនេះ ជាមួយនឹងការផ្លាស់ប្តូរយុទ្ធសាស្ត្រដែលអនុញ្ញាតឱ្យ Bellingham, Tchouameni និង Camavinga បង្ហាញភាពលេចធ្លោក្នុងជម្រើស ១១នាក់ដំបូងរបស់ Real Madrid។
Bellingham បានចាប់ផ្ដើមដ៏គួរឱ្យចាប់អារម្មណ៍នៅក្នុងក្លឹបដោយស៊ុតបញ្ចូលទីបាន 13 គ្រាប់ក្នុង 13 ប្រកួតនៅគ្រប់ការប្រកួតទាំងអស់ ខណៈដែល Tchouameni ក៏បានសហការយ៉ាងល្អនៅតំបន់ខ្សែបម្រើ។ បើក្រឡេកមកមើល Camavinga បានផ្លាស់ប្តូររវាងការលេងនៅខ្សែបម្រើកណ្តាល ទៅជាខ្សែការពារឆ្វេង ដែលជាតួនាទីដែលគាត់បានរៀន និងរីកចម្រើនក្នុងរយៈពេល 12 ខែចុងក្រោយនេះ បន្ទាប់ពីបានជំនួសកីឡាករ Ferland Mendy ដែលរងរបួស។
Real Madrid បានមើលឃើញថាអ្នកទាំងបី គឺជាស្នូលដ៏សំខាន់រយៈពេលជាច្រើនឆ្នាំខាងមុខ រួមជាមួយ Vinicius Junior ដែលបានចុះកិច្ចសន្យាថ្មីរយៈពេល 4 ឆ្នាំដើម្បីបន្តនៅ Santiago Bernabeu រហូតដល់យ៉ាងហោចណាស់ឆ្នាំ 2027 ហើយការពិភាក្សាលើកិច្ចព្រមព្រៀងថ្មីសម្រាប់ Tchouameni នឹងត្រូវកំណត់នៅឆ្នាំក្រោយ៕
