គ្រូបង្វឹកក្រុមជម្រើសជាតិអង់គ្លេសលោក Gareth Southgate បានថ្លឹងថ្លែងលើការជជែកដេញដោល VAR ដោយនិយាយថា គាត់មិនចូលចិត្តបច្ចេកវិទ្យានេះ ហើយចង់ទទួលយកតាមការសម្រេចចិត្តរបស់អាជ្ញាកណ្តាលនៅលើទីលានវិញ។
VAR បានស្ថិតនៅក្រោមការត្រួតពិនិត្យយ៉ាងតឹងរ៉ឹង បន្ទាប់ពីមន្ត្រីបានធ្វើអោយមានកំហុសក្នុងការសម្រេចចិត្តមិនផ្ដល់គ្រាប់បាល់របស់ Luis Diaz សម្រាប់ក្រុម Liverpool ទល់នឹង Tottenham កាលពីថ្ងៃសៅរ៍ បើទោះបីជាឃើញថាគាត់មិនស្ថិតក្នុងជំហរ offside ។
កំហុសដែលបានកើតឡើងដោយ VAR លោក Darren England និងជំនួយការ Dan Cook ត្រូវបានផ្អាកការងារ។ ហើយគណកម្មការអាជ្ញាកណ្ដាល PGMOL បានសុំទោស Liverpool និង Jurgen Klopp។
លោក Southgate ត្រូវបានសួរសម្រាប់ទស្សនៈរបស់គាត់ចំពោះ VAR នៅក្នុងសន្និសីទសារព័ត៌មានកាលពីថ្ងៃព្រហស្បតិ៍ ហើយបានទទូចថា គាត់មិនពេញចិត្តនឹងការណែនាំអំពីបច្ចេកវិទ្យានេះទេ ដោយបន្ថែមថាការសង្ស័យរបស់គាត់ពីគ្រាប់បាល់របស់ Jesse Lingard ក៏មិនត្រូវបានផ្ដល់អោយក្នុងការប្រកួត UEFA Nations League របស់ប្រទេសអង់គ្លេស ជាមួយហូឡង់ក្នុងឆ្នាំ 2019 ។
គាត់បាននិយាយថា ៖ «នៅពេលដែលអ្នកនិយាយ ពីភាពអយុត្តិធម៌ VAR ខ្ញុំប្រហែលជាមនុស្សដំបូង។ ខ្ញុំនៅតែចងចាំ គ្រាប់បាល់របស់ Jesse Lingard ដែលបានធ្វើអោយយើងធ្លាក់ចេញពីវគ្គពាក់កណ្តាលផ្តាច់ព្រ័ត្រ គឺយើងគួរទទួលបានគ្រាប់បាល់នោះ។ ខ្ញុំមិនចូលចិត្តវាទេ។ ខ្ញុំគិតថាយើងគួរតែទទួលយកការសម្រេចចិត្តរបស់អាជ្ញាកណ្តាល ប៉ុន្តែខ្ញុំក៏ដឹងដែរថា យើងមិនអាចត្រលប់ទៅពិភពលោកដែលមិនមានបច្ចេកវិទ្យាជាផ្នែកនៃការសម្រេចចិត្តនោះទេ»៕
