ការប្តឹងឧទ្ធរណ៍របស់ Liverpool ជុំវិញការផ្ដល់កាតក្រហមអោយ Curtis Jones ក្នុងពេលលេងជាមួយ Tottenham មិនបានជោគជ័យទេ ដោយខ្សែបម្រើរូបនេះត្រូវបានព្យួរឈ្មោះពីការប្រកួតក្របខ័ណ្ឌ Premier League រហូតដល់ខែវិច្ឆិកា។
លោក Jurgen Klopp មិនសប្បាយចិត្តនឹងការបណ្តេញ Jones ចេញបន្ទាប់ពីនោះគាត់និយាយថា៖ «Curtis បានបោះជើងរបស់គាត់នៅលើបាល់មុនរមៀលប៉ះជើង Bissouma។ វាមិនមែនជាការប៉ះទង្គិចធ្ងន់ធ្ងរនោះទេ យើងពិតជាមិនអាចទទួលយកបានទេ»។
Liverpool បានដាក់បណ្តឹងឧទ្ធរណ៍ជុំវិញកាតក្រហមកាលពីថ្ងៃច័ន្ទ ប៉ុន្តែមិនបានជោគជ័យទេ ហើយក្រុមហង្សក្រហមបញ្ជាក់ថា Jones នឹងពិន័យព្យួរចំនួនបីប្រកួត។
សេចក្តីថ្លែងការណ៍មួយកាលពីល្ងាចថ្ងៃអង្គារបានលើកឡើងថា៖ «Curtis Jones ត្រូវបានកំណត់ដើម្បីការព្យួរសម្រាប់ការប្រកួត Premier League បីប្រកួតបន្ទាប់ពីការអំពាវនាវឱ្យលុបចោលកាតក្រហមដែលគាត់បានទទួលនៅក្នុងប្រកួតជាមួយ Tottenham Hotspur កាលពីថ្ងៃសៅរ៍មិនបានជោគជ័យ»។
ឥឡូវនេះ Jones នឹងមិនបានលេងអោយ Liverpool ទល់នឹង Brighton & Hove Albion, Everton និង Nottingham Forest ក្នុងខែនេះទេ។ ទន្ទឹមនឹងនោះ Diogo Jota ក៏នឹងមានការព្យួរមួយប្រកួតផងដែរ បន្ទាប់ពីគាត់ត្រូវបានពិន័យកាតលឿងចំនួនពីរ កាលពីថ្ងៃអាទិត្យ។
គួបញ្ជាក់ Jones អាចលេងទល់នឹង Union Saint-Gilloise និង Toulouse ក្នុង Europa League ប៉ុន្តែនឹងមិនអាចបង្ហាញខ្លួនក្នុងការប្រកួត Premier League រហូតដល់ Liverpool ប៉ះ Luton Town នៅថ្ងៃទី 5 ខែវិច្ឆិកា៕
