សហព័ន្ធបាល់ទាត់អ៊ុយក្រែន FA បានស្នើទៅកាន់សមាគមបាល់ទាត់អឺរ៉ុប UEFA សុំកុំអោយក្រុម U17 អ៊ុយក្រែនលេងទល់នឹង U17 រុស្ស៊ី បន្ទាប់ពីការសម្រេចចិត្តរបស់ UEFA ក្នុងការដាក់បញ្ចូលក្រុមជម្រើសជាតិរុស្ស៊ីសម្រាប់កម្រិតយុវជន។
យោងតាម BBC Sport បានបញ្ជាក់ថា ការសម្រេចចិត្តនេះមិនត្រូវបានគាំទ្រជាឯកច្ឆ័ន្ទនៅក្នុង UEFA ដែលកើតឡើងបន្ទាប់ពីស្ថាប័នគ្រប់គ្រងបាល់ទាត់អឺរ៉ុប បានហាមឃាត់ភាគីរុស្ស៊ីទាំងអស់បន្ទាប់ពីវាយប្រហារលើអ៊ុយក្រែនក្នុងខែកុម្ភៈឆ្នាំ 2022 ។
សហព័ន្ធបាល់ទាត់របស់អង់គ្លេសបាននិយាយរួចហើយថា ខ្លួននឹងមិនអនុញ្ញាតឱ្យក្រុមជម្រើសជាតិអង់គ្លេសលេងជាមួយរុស្ស៊ីទេ។ ដោយឡែកស៊ុយអែតក៏បាននិយាយថាក្រុម U17 របស់ខ្លួននឹងមិនធ្វើជាម្ចាស់ផ្ទះទទួលស្វាគមន៍រុស្ស៊ីដូចគ្នា។
UEFA បានធ្វើការផ្លាស់ប្តូរដ៏គួរឱ្យភ្ញាក់ផ្អើលកាលពីដើមសប្តាហ៍នេះ ហើយឥឡូវនេះកំពុងសម្រេចចិត្តពីរបៀបបញ្ចូលក្រុមត្រឡប់ទៅក្នុងការប្រកួតជើងឯកអ៊ឺរ៉ុបផ្នែកបុរស និងស្ត្រី ដែលនឹងប្រព្រឹត្តទៅនៅឆ្នាំក្រោយ ។
ប្រធាន UEFA លោក Aleksander Ceferin បាននិយាយថា កីឡាករយុវជនមិនគួរទទួលខុសត្រូវចំពោះសកម្មភាពរបស់រដ្ឋាភិបាលរុស្ស៊ីនោះទេ។ តាមមើលទៅរឿងនេះ មិនត្រូវបានទទួលយកដោយជនជាតិអ៊ុយក្រែន ហើយការសម្រេចនេះ ត្រូវបានបដិសេធ។
នៅក្នុងលិខិតរបស់ខ្លួន សហព័ន្ធអ៊ុយក្រែន បាននិយាយថា៖ «យើងត្រូវបានគេជឿជាក់ថា រាល់ជំហានឆ្ពោះទៅរកការធ្វើសមាហរណកម្មអ្នកតំណាងរុស្ស៊ីឡើងវិញ គឺជានិន្នាការដ៏គ្រោះថ្នាក់ និងគួរឱ្យភ័យខ្លាច ដែលមានន័យថា គ្មានអ្វីក្រៅពីការគាំទ្រដល់រដ្ឋភេរវកររុស្ស៊ី និងឧក្រិដ្ឋកម្មទាំងអស់របស់ពួកគេ ដែលបានប្រព្រឹត្តនៅក្នុងអ៊ុយក្រែន»។
ការប្រកួតវគ្គផ្តាច់ព្រ័ត្រពានរង្វាន់ទ្វីបអឺរ៉ុបបុរសអាយុក្រោម 17 ឆ្នាំបន្ទាប់នឹងត្រូវប្រកួតនៅប្រទេសអេស៊ីបនៅឆ្នាំក្រោយ ហើយក្រុមនារីនឹងធ្វើឡើងនៅខែឧសភានៅប្រទេសស៊ុយអែត។
បន្ទាប់ពីការហាមឃាត់ក្រុមរបស់ប្រទេសនេះពីការប្រកួតពានអឺរ៉ុប UEFA ក៏បានដកហូតសិទ្ធិធ្វើជាម្ចាស់ផ្ទះរបស់រុស្ស៊ីសម្រាប់ការប្រកួតវគ្គផ្តាច់ព្រ័ត្រ Champions League ឆ្នាំ 2022 និង 2023៕
