តារាឆ្នើមរបស់ក្លឹប Arsenal កីឡាករ Gabriel Martinelli និង Thomas Partey បានចូលហ្វឹកហាត់វិញមុនពេលការប្រកួត North London Derby ចុងសប្តាហ៍នេះ។
ក្រុមកាំភ្លើងធំត្រៀមខ្លួនទទួលស្វាគមន៍គូប្រជែង Tottenham នៅកីឡដ្ឋាន Emirates នៅរសៀលថ្ងៃអាទិត្យ បន្ទាប់ពីការចាប់ផ្តើមដ៏អស្ចារ្យរបស់ក្រុមទាំងពីរក្នុងរដូវកាលថ្មី។ ក្រុមរបស់លោក Mikel Arteta បានឈ្នះចំនួនបួន និងស្មើមួយក្នុងចំណោមការប្រកួតបើកឆាក Premier League ចំនួន 5 របស់ពួកគេ។
ប៉ុន្តែភាពអវិជ្ជមាននោះគឺ ខ្សែប្រយុទ្ធប្រេស៊ីល Martinelli ។ កីឡាករវ័យ 22 ឆ្នាំរូបនេះមិនទាន់រកគ្រាប់បាល់បាននៅឡើយទេនៅរដូវកាលនេះ ប៉ុន្តែបានចាប់ផ្តើមរាល់ការប្រកួតលីកក្រោមការដឹកនាំរបស់ Arteta និងបានបញ្ជូនបាល់ឱ្យមិត្តរួមក្រុមបញ្ចប់ទីចំនួន 2 ដង។
ទោះជាយ៉ាងណាក៏ដោយ Arsenal ប្រហែលជាមិនអាចដាក់កីឡាករ Martinelli បានទេ បន្ទាប់ពីគាត់បានរបួសសរសៃពួរក្នុងជ័យជម្នះ 1-0 លើក្រុម Everton កាលពីពេលថ្មីៗនេះនៅឯកីឡដ្ឋាន Goodison Park ។
ថ្លែងនៅក្នុងសន្និសីទសារព័ត៌មានមុនការប្រកួតរបស់គាត់ គ្រូបង្វឹកសញ្ជាតិអេស្ប៉ាញរូបនេះបាននិយាយថា៖ «ជាមួយ Martinelli យើងនៅតែវាយតម្លៃគាត់ ដូច្នេះចាំមើលថាតើគាត់អាចចូលរួមការប្រកួតបានឬអត់។ សម្រាប់ Partey យើងសង្ឃឹមថានឹងមានគាត់»។
ប្រសិនបើ Martinelli មិនបានចូលលេង នោះនឹងធ្វើឱ្យ Arteta សម្រេចចិត្តដាក់ខ្សែប្រយុទ្ធបែលហ្ស៊ិក Leandro Trossard ជំនួសមិត្តរួមក្រុមរបស់គាត់នៅផ្នែកខាងឆ្វេង ។
អតីតកីឡាករ Brighton រកបានគ្រាប់បាល់នៅពាក់កណ្តាលតង់ទីពីរនៅ Merseyside ។ គាត់បានបង្កើតភាពវិជ្ជមានក្នុងជ័យជម្នះ 4-0 របស់កាំភ្លើងធំក្នុងការប្រកួតពានរង្វាន់ Champions League លើក្រុមហូឡង់ PSV Eindhoven ជាការប្រកួតដែល Martinelli អវត្តមាន៕
