ប្រធានក្លឹប Barcelona លោក Joan Laporta បានបង្ហាញទំនុកចិត្តថា ការស្ដារឡើងវិញផ្នែកហិរញ្ញវត្ថុរបស់ក្លឹប អាចដោះស្រាយបានលឿនជាងការរំពឹងទុក បន្ទាប់ពីការគ្រប់គ្រងយ៉ាងប្រុងប្រយ័ត្នលើការចំណាយរយៈពេលជាង 2 ឆ្នាំចុងក្រោយនេះ ។
ការចំណាយហិរញ្ញវត្ថុមិនត្រឹមត្រូវ ក្រោមការដឹកនាំរបស់គ្រូបង្វឹកមុន រួមនឹងឥទ្ធិពលសេដ្ឋកិច្ច នៃជំងឺរាតត្បាត Covid-19 បានធ្វើឲ្យ Barca ធ្លាក់ក្នុងវិបត្តិហិរញ្ញវត្ថុធ្ងន់ធ្ងរ។
ក្លឹបត្រូវបានបង្ខំឱ្យកាត់បន្ថយការចំណាយ និងស្វែងរកវិធីផ្សេងៗក្នុងការបង្កើនដើមទុនថ្មី ដើម្បីឱ្យពួកគេបន្តចុះឈ្មោះកីឡាករ និងកិច្ចសន្យាថ្មីស្របតាមច្បាប់នៃការចំណាយរបស់ La Liga ។
ឥឡូវនេះ បំណុលនៅតែត្រូវបានគេរាយការណ៍ថាមានប្រហែល 1.3 ពាន់លានអឺរ៉ូក្នុងខែមិថុនា ខណៈពេលដែលគម្រោង Espai Barca ដែលរួមបញ្ចូលការអភិវឌ្ឍន៍ឡើងវិញនៃកីឡដ្ឋាន Camp Nou ដែលបណ្តាលឱ្យមានកិច្ចព្រមព្រៀងហិរញ្ញវត្ថុកើនឡើងចំនួន 1.4 ពាន់លានអឺរ៉ូដែលនឹងចាប់ផ្តើមទូទាត់នៅពេលដែលកីឡដ្ឋានថ្មីត្រូវបានបើកឡើង ហើយពួកគេមានរយៈពេលបង់ចំនួន 24 ឆ្នាំ ។
ប៉ុន្តែសរុបមក Laporta ហាក់ដូចជាមានទំនុកចិត្តថាបញ្ហាហិរញ្ញវត្ថុរបស់ Barca នឹងមិនមានរយៈពេលយូរទៀតទេ ។
គាត់បាននិយាយតាមរយៈ Marca ថា៖ «យើងកំពុងធ្វើឱ្យប្រសើរឡើងក្នុងគ្រប់ទិដ្ឋភាពទាំងអស់។ យើងទាំងអស់គ្នាគិតថាយើងមានក្រុមដ៏ល្អនៅឆ្នាំនេះ។ អបអរសាទរអ្នកគ្រប់គ្នាដែលមានទំនួលខុសត្រូវក្នុងការជួយក្រុម។ យើងបានខិតខំប្រឹងប្រែងយ៉ាងខ្លាំង ដើម្បីអាចចុះឈ្មោះកីឡាករល្អបាន។ យើងគិតថាវាសមនឹងការខិតខំប្រឹងប្រែងដែលយើងបានធ្វើ។ ដោយសារយើងមានទំនុកចិត្តច្រើនលើការគ្រប់គ្រងដែលយើងកំពុងធ្វើ ហើយក្លឹបនឹងងើបឡើងវិញលឿនជាងការរំពឹងទុកក្នុងផែនការយុទ្ធសាស្ត្ររបស់យើង»៕
