ភ្នំពេញ៖ កីឡាករវ៉ូវីណាមជម្រើសជាតិកម្ពុជា ជិន ពិសិដ្ឋ ម្ចាស់មេដាយមាស និងប្រាក់ ស៊ីហ្គេម ២០២៣ បានបង្ហាញពីមោទកភាពខ្លាំងណាស់ដែលទទួលបានមេដាយមាស និងមានវត្តមាននៅក្នុងព្រឹត្ដិការណ៍ស៊ីហ្គេមនេះ ដើម្បីតំណាងឱ្យប្រទេសកម្ពុជា ក្នុងព្រឹត្តិការណ៍កីឡាប្រវត្តិសាស្ត្រនៅកម្ពុជា និងបានលើកទង់ជាតិកម្ពុជាឱ្យបរទេសបានឃើញថាកម្ពុជាក៏មានសមត្ថភាពដែរ។
ថ្លែងប្រាប់អ្នកសារព័ត៌មានក្រោយបញ្ចប់ការប្រកួតកីឡាស៊ីហ្គេមកាលពីល្ងាចថ្ងៃទី០៩ ខែឧសភា ឆ្នាំ២០២៣ នៅទីលានមជ្ឈមណ្ឌលសន្និបាត និងពិព័រណ៍អន្ដរជាតិជ្រោយចង្វារ រាជធានីភ្នំពេញ ម្ចាស់មេដាយមាស និងប្រាក់រូបនេះបានបង្ហាញអារម្មណ៍រំភើប ដែលបានចូលរួមប្រកួតក្នុងព្រឹត្តិការណ៍ជាប្រវត្តិសាស្ត្រនេះ ព្រោះកន្លងមកខ្លួនធ្លាប់តែចូលរួមប្រកួតនៅប្រទេសគេ។ ម្ចាស់មេដាយមាសរូបនេះបានបញ្ជាក់ថា៖ «ប៉ុន្តែលើកនេះយើងបានប្រកួតនៅក្នុងប្រទេសយើង ដែលធ្វើឱ្យយើងមានអារម្មណ៍កក់ក្ដៅ ដោយសារតែមានបងប្អូនប្រជាពលរដ្ឋ សាច់ញាតិមកលើកទឹកចិត្ត និងធ្វើឱ្យមានកម្លាំងចិត្តក្នុងការប្រកួតដណ្តើមមេដាយ»។
កីឡាករ ជិន ពិសិដ្ឋ បានថ្លែងអំណរគុណចំពោះសម្ដេចតេជោ ហ៊ុន សែន ដែលជាស្ថាបនិកសន្តិភាពសម្រាប់កម្ពុជា ដែលធ្វើឱ្យប្រទេសកម្ពុជាមានឱកាសធ្វើជាម្ចាស់ផ្ទះជាលើកទីមួយ ព្រមទាំងថ្នាក់ដឹកនាំទាំងអស់ដែលខិតខំទាំងកម្លាំងកាយចិត្ត ដើម្បីធ្វើឱ្យព្រឹត្តិការណ៍នេះកាន់តែអស្ចារ្យ និងបង្ហាញឱ្យអន្តរជាតិឃើញថា កម្ពុជាអាចធ្វើបាន។ ជាមួយគ្នានេះ ម្ចាស់មេដាយមាសផ្នែកវ៉ូវីណាមរូបនេះ ក៏បានអរគុណចំពោះបងប្អូនប្រជាពលរដ្ឋបានមកចូលរួមលើកទឹកចិត្ត ជាពិសេសចំពោះក្រុមគ្រូពេទ្យដែលជួយសម្រួលសរសៃ ម៉ាស្សាសាច់ដុំ ដែលធ្វើឱ្យក្រុមជម្រើសជាតិមានសុខភាពល្អ។
សូមបញ្ជាក់ថា កីឡាករ ជិន ពិសិដ្ឋ ឈ្នះមេដាយមាស១ លើវិញ្ញាសាការពារខ្លួនចម្រុះ បុរស៣ និងនារី៣នាក់ ជាមួយកីឡាករ សាន សុជាតិ, ម៉េត សុភក្ត្រា និងកីឡាការិនី ប៉ាល់ ឆរស្មី, ពៅ សុខា, ឃន ចាន់សុភ័ក្រនាថ និងទទួលបានមេដាយប្រាក់ លើវិញ្ញាសាបុរសម្នាក់ការពារខ្លួន ទល់នឹងបុរស៣នាក់មានអាវុធ និងមេដាយសំរឹទ្ធ១លើវិញ្ញាសាសម្តែងជាក្រុមផងដែរ៕
ប្រភព៖ ទីភ្នាក់ងារសារព័ត៌មានកម្ពុជា
