ទីប្រឹក្សាកីឡារបស់ក្លឹប Paris Saint-Germain លោក Luis Campos កំពុងស្វែងរកការផ្ទេរលើកីឡាករខ្សែបម្រើ ហើយក្នុងបញ្ជីរបស់គាត់ក៏មានឈ្មោះកីឡាករ Manu Koné ផងដែរ។
ខ្សែបម្រើ Borussia Mönchengladbach គឺជាកីឡាករលេចធ្លោរមួយផងដែរក្នុងរដូវក្តៅនេះ ដោយមានក្លឹប Paris Saint-Germain, Chelsea និង Manchester United កំពុងសង្កេតមើលកីឡាករវ័យ 21 ឆ្នាំ ដែលកុងត្រារបស់គាត់នឹងផុតកំណត់នៅឆ្នាំ 2025។
យោងតាមការចេញផ្សាយលើបណ្ដាញសង្គមរបស់លោក Fabrizio Romano បានអោយដឹងថាក្លឹប Mönchengladbach នឹងលក់គាត់ក្នុងតម្លៃអប្បបរមា ៥០លានអឺរ៉ូ ដោយមិនទាន់បូកបញ្ចូលជាមួយប្រាក់បន្ថែមផ្សេងៗទេ។
Koné បានប្រាប់សារព័ត៌មានបារាំងថា៖ «នៅពេលនេះ ខ្ញុំនៅ Mönchengladbach។ ខ្ញុំរស់នៅជាមួយពាក្យចចាមអារ៉ាម ខ្ញុំមិនដែលយកចិត្តទុកដាក់លើអ្វីទាំងអស់ដែលគេនិយាយនោះទេ»
។
Koné បាននិយាយទាំងញញឹមថា៖ «វាជាការពិតដែលខ្ញុំជាជនជាតិបារាំង។ ខ្ញុំបានកើត និងហ្វឹកហាត់នៅទីនោះកន្លងមក Paris FC និង Boulogne-Billancourt។ ប៉ុន្តែមិនថាប៉ារីស ឬក្លឹបផ្សេងទេ ខ្ញុំមិនខ្វល់ឡើយ។ ខ្ញុំគ្រាន់តែចង់លេងបាល់ទាត់នៅ Mönchengladbach។ ដូច្នេះប្រសិនបើខ្ញុំត្រូវចាកចេញ ខ្ញុំនឹងគិតដល់ថា ខ្ញុំអាចជាអាទិភាពសម្រាប់ការប្រកួតក្នុងក្លឹបនោះដែរទេ»៕
