តារាឆ្នើមរបស់ក្លឹប Paris Saint-Germain កីឡាករ Neymar Jr. បានធ្វើការអះអាងមិនគួរឱ្យជឿអំពី Cristiano Ronaldo នៅមុនការប្រកួត FIFA World Cup ឆ្នាំ 2022 ។
កំពូលតារាឆ្នើម PSG និង Manchester United នឹងដឹកនាំក្រុមជម្រើសជាតិរៀងៗខ្លួន ប្រេស៊ីល និងព័រទុយហ្គាល់ អំឡុងពេលការប្រកួតនៅប្រទេសកាតា។ ទោះជាយ៉ាងណាក៏ដោយការចាប់ផ្តើមរដូវកាលរបស់កីឡាករទាំងពីរជាមួយនឹងក្លឹបរបស់ពួកគេ គឺមិនដូចគ្នាឡើយ។
Neymar មានភាពអស្ចារ្យជាមួយ PSG ក្នុងយុទ្ធនាការនេះដោយក្នុង 19 ប្រកួតគាត់ស៊ុតបញ្ចូលទីបាន 15 គ្រាប់ និងបញ្ជូនបាល់ឲ្យមិត្តរួមក្រុមបញ្ចប់ទីបាន 12 ដង។
ទន្ទឹមនឹងនោះ Ronaldo បានឈានទៅដល់ការចាប់ផ្តើមដ៏អាក្រក់បំផុតរបស់គាត់នាពេលថ្មីៗនេះ ដោយក្នុងការប្រកួតចំនួន 16 កីឡាករសញ្ជាតិព័រទុយហ្គាល់រូបនេះស៊ុតបញ្ចូលទីបានតែ 3 គ្រាប់ប៉ុណ្ណោះនិង Assist ពីរលើក។
យ៉ាងណាក៏ដោយ Neymar បានប្រាប់សារព័ត៌មាន G1 ថា៖ «ឆន្ទៈដែល Cristiano មាន រួមទាំងបុគ្គលិកលក្ខណៈ និងទំនុកចិត្ត គឺអស្ចារ្យជាងអ្វីដែលអ្នកធ្លាប់ស្រមៃ»។
អ្នកទាំងពីរជាគូប្រជែងនឹងគ្នាក្នុងអំឡុងពេលពួកគេនៅប្រទេសអេស្ប៉ាញ ខណៈ Ronaldo តំណាងឱ្យ Real Madrid ហើយកីឡាករប្រេស៊ីលជាកីឡាកររបស់ Barcelona។
ពួកគេមិនទាន់អាចប៉ះគ្នានៅ UEFA Champions League បន្ទាប់ពី Ronaldo បានចាកចេញទៅ Juventus និងក្រោយមកវិលមកកាន់ Manchester United វិញ។ ទោះយ៉ាងណាក៏ដោយ ពួកគេតែងតែកោតសរសើរចំពោះគុណសម្បត្ដិរបស់គ្នាទៅវិញទៅមក។
នៅក្នុងបទសម្ភាសន៍ឆ្នាំ 2019 Cristiano Ronaldo បានហៅ Neymar ថាជាកីឡាករដ៏អស្ចារ្យ។ គាត់បានប្រាប់ទៅកាន់សារព័ត៌មាន MARCA ថា៖
«គាត់ជាកីឡាករដ៏អស្ចារ្យ ហើយខ្ញុំបន្តមានទំនាក់ទំនងល្អជាមួយគាត់។ ខ្ញុំចូលចិត្តមើលគាត់លេង ហើយមិនថាគាត់នៅទីណាទេ ថែរក្សាខ្លួនគាត់ និងជៀសវាងរបួស។ នោះហើយជាអ្វីដែលខ្ញុំចង់បានសម្រាប់គាត់»៕
