Cristiano Ronaldo បានមកដល់កន្លែងហ្វឹកហាត់របស់ Manchester United ជាមួយនឹងភ្នាក់ងាររបស់គាត់គឺលោក Jorge Mendes ដើម្បីពិភាក្សាជាមួយថ្នាក់ដឹកនាំក្លឹបអំពីអនាគតរបស់គាត់។
យោងតាមកាសែត The Athletic បានឲ្យដឹងថាអតីតអ្នកចាត់ការក្លឹបលោក Sir Alex Ferguson ក៏នឹងមានវត្តមាន ដើម្បីពិភាក្សាអំពីអនាគតរបស់ខ្សែប្រយុទ្ធវ័យ 37 ឆ្នាំរូបនេះ ដែលបានខកខានមិនបានទៅចូលរួមការប្រកួតមុនបើករដូវកាលរបស់បិសាចក្រហមនៅប្រទេសថៃ និងអូស្ត្រាលី។
Sky Sports បានរាយការណ៍កាលពីដើមខែនេះថាម្ចាស់ពានរង្វាន់ Ballon d’Or ប្រាំសម័យបានបង្ហាញពីបំណងចង់ចាកចេញពី Old Trafford នៅរដូវក្តៅនេះដើម្បីចូលរួមប្រកួតប្រជែងក្របខ័ណ្ឌ Champions League ក៏ដូចជាមិនសប្បាយចិត្តជាមួយនឹងកង្វះសកម្មភាពផ្ទេរកីឡាករចំណូលថ្មីរបស់ក្លឹបរហូតមកដល់ពេលនេះ។
គួររំលឹកឡើងវិញដែរថា ខ្សែប្រយុទ្ធជើងចាស់រូបនេះ បន្ទាប់ពីបានវិលចូល Man Utd វិញមិនអាចជួយក្រុមរបស់គាត់ឱ្យឈានចំណាត់ថ្នាក់ Top4 របស់ Premier League បានទេ ខណៈដែលបិសាចក្រហមបានបញ្ចប់ជាមួយនឹងពិន្ទុទាបបំផុតមិនធ្លាប់មាន៕
