Arsenal បានបង្ហាញចំណាប់អារម្មណ៍ក្នុងការចុះហត្ថលេខាលើខ្សែការពាររបស់ក្លឹប RB Leipzig កីឡាករ Josko Gvardiol នៅរដូវក្តៅនេះ ដើម្បីកែលម្អក្រុមមុនពេលរដូវកាលថ្មី នេះបើយោងតាមការចេញផ្សាយរបស់ Football 365។
Josko Gvardiol វ័យ 20 ឆ្នាំបានបង្ហាញឱ្យឃើញថា ជាខ្សែការពារវ័យក្មេងដ៏ល្អបំផុតនៅ RB Leipzig ។ គាត់បានចូលរួមជាមួយក្លឹបកាលពីរដូវក្តៅមុនពី Dinamo Zagreb។ គាត់បានបង្ហាញខ្លួនចំនួន 46 លើកកាលពីរដូវក្តៅមុន ដោយបានរួមចំណែករកគ្រាប់បាល់បានពីរគ្រាប់ និងបញ្ជូនបាល់ឱ្យមិត្តរួមក្រុមបញ្ចប់ទីចំនួន 3 ដង។
យោងតាម Transfermarkt បច្ចុប្បន្ន Gvardiol មានតម្លៃប្រហែល 32 លានផោន។ ទោះជាយ៉ាងណាក៏ដោយ Arsenal មិនមែនជាក្លឹបតែមួយគត់ក្នុងការតាមប្រមាញ់ Gvardiol នោះទេ។ ម្ចាស់ជើងឯក Premier League ក្រុម Manchester City ក៏ស្ថិតក្នុងការប្រជែងដណ្តើមយកខ្សែការពារអន្តរជាតិក្រូអាត ដែលអាចលេងជាខ្សែការពារឆ្វេងផងដែរ៕
