Manchester City បានប្រកាសអំពីកិច្ចព្រមព្រៀងរបស់ពួកជាមួយ Borussia Dortmund សម្រាប់ Erling Haaland កាលពីម្សិលមិញ ហើយការពិភាក្សាទាំងអស់បានចាប់ផ្តើមជុំវិញពីរបៀបដែលតារាឆ្នើមវ័យក្មេងរូបនេះនឹងសម្របខ្លួន ព្រមទាំងការបង្ហាញទម្រង់លេងនៅក្លឹប។ អតីតតារាឆ្នើមរបស់ក្រុមហង្សក្រហម Liverpool លោក Jamie Carragher ជឿជាក់ថា វាជាការចុះហត្ថលេខាដ៏អស្ចារ្យមិនត្រឹមតែសម្រាប់ក្រុម Man City ប៉ុណ្ណោះទេ ប៉ុន្តែសម្រាប់ក្របខ័ណ្ឌ Premier League ផងដែរ។ ទោះជាយ៉ាងណាក៏ដោយគាត់ក៏បង្ហាញការយល់ឃើញថា វានឹងមិនអាចធានាដោយស្វ័យប្រវត្តិសម្រាប់ Manchester City នូវភាពជោគជ័យដែលពួកគេចង់បាននោះទេ។
ទោះបីជា Erling Haaland គឺជាខ្សែប្រយុទ្ធដ៏ល្អបំផុតមួយនៅក្នុងពិភពលោកនាពេលបច្ចុប្បន្ន ហើយហាក់ដូចជាអ្វីដែល Manchester City កំពុងខ្វះខាតក៏ដោយ លោក Carragher ជឿជាក់ថា ការរួមបញ្ចូលរបស់គាត់ទៅក្នុងក្រុមគឺត្រូវចំណាយពេលច្រើន។ អតីតខ្សែការពាររូបនេះមិនមានការងឿងឆ្ងល់ថា Haaland នឹងរកគ្រាប់បាល់បាននោះទេ ប៉ុន្តែអះអាងថា វានឹងគួរឱ្យចាប់អារម្មណ៍ក្នុងការមើលថា តើគាត់អាចធ្វើបានល្អប៉ុណ្ណា។
ថ្លែងទៅកាន់ Sky Sports អំពីការផ្ទេរនាពេលខាងមុខ លោក Carragher បាននិយាយថា៖
«ការចុះហត្ថលេខាដ៏អស្ចារ្យ មិនមែនសម្រាប់តែ Manchester City ប៉ុណ្ណោះទេ ប៉ុន្តែសម្រាប់ Premier League ខ្ញុំគិតថាយើងទាំងអស់គ្នាចាប់អារម្មណ៍ពីទម្រង់លេងរបស់គាត់ ហើយអ្នកពិតជារីករាយណាស់ដែលគាត់ផ្ទេរមក Premier League»។
«បច្ចុប្បន្នអ្នកពិតជាមានអារម្មណ៍ថាដូចជា Premier League គឺជាលីកខ្លាំងបំផុត អ្នកបានឃើញពីរបៀបដែលយើងធ្វើបានល្អនៅក្នុង Champions League»។
«គាត់នឹងរកគ្រាប់បាល់បាន នោះជាអ្វីដែលក្លឹបមេឃខៀវរំពឹងទុក ពិតណាស់គាត់នឹងអាចធ្វើបាន។ ប៉ុន្តែវាមិនធានាថា Man City នឹងឈ្នះអ្វីគ្រប់យ៉ាងនោះទេ»៕
